समाचारहरू

खाँदवारी नगरपालिका-८ स्थायी घर भइ नेपाल विद्युत प्राधिकरण कार्यालय, सङ्खुवासभाको शाखा कार्यालय मादीमा इञ्चार्जका रूपमा कार्यरत ३५ वर्षीय राजकुमार राई र मादी नगरपालिका-७ का ३० वर्षीय प्रदीप जिमीलाई कुटपिट घटनाका दोषीलाई कारबाहीको माग गरिएको छ ।

नेपाल राष्ट्रिय कर्मचारी सङ्गठन, निजामती जिल्ला कार्यसमितिले प्रमुख जिल्ला अधिकारीलाई दोषीलाई कारबाही माग गर्दै ज्ञापनपत्र बुझाएको हो ।

नेपाल विद्युत प्राधिकरण कार्यालय, सङ्खुवासभामा कार्यरत कर्मचारीमाथि कुटपिट गर्नेलाई कारवाहीको माग गर्दै नेपाल राष्ट्रिय कर्मचारी सङ्गठन निजामती जिल्ला कार्यसमितिले प्रमुख जिल्ला अधिकारीलाई ज्ञापनपत्र बुझाएका हुन् ।

विद्युत महशुल नतिरेपछि लाइन काटेको र लाइन जोड्न धम्की दिदै  मादी नगरपालिका-४ ओखरबोटका लक्ष्मण लिङ्थेप र हर्कहाङ लिम्बूले शाखा कार्यालय मादीका इञ्चार्ज राजकुमार र कार्यगत तालिममा खटिएका विद्यार्थी प्रदीप जिमीमाथि कुटपिट भएको थियो ।

विद्युत महसुल नतिरेर ०८१ साउन १४ गते लाइन काटिएको बिषयमा विवाद हुँदा नेपाल विद्युत प्राधिकरण वितरण शाखा कार्यालय मादीका इञ्चार्ज  राई र ओजेटिमा खटिएका विद्यार्थी जिमीलाई कुटपिट भएको थियो ।  कार्यालय परिसरमा प्रवेश गरेर कुटपिट गर्नेलाई कारवाहीको माग गर्दै प्रमुख जिल्ला अधिकारीलाई ध्यानाकर्षण गराउँदै ज्ञापनपत्र बुझाएको नेपाल राष्ट्रिय कर्मचारी सङ्गठन, निजामती जिल्ला कार्यसमितिका अध्यक्ष भोलामान राईले बताउनु भयो ।

कार्यालय परिसर भित्रै पसेर कर्मचारीमाथि कुटपिट गरिनु दुखद विषय भएको अध्यक्ष राईले बताउनु भयो । कर्मचारीहरूमाथि कुटपिटका घटनाले सेवा प्रवाहमा समेत गम्भीर असर पर्ने अध्यक्ष राईको भनाइ छ । क्रसर सञ्चालन लिङ्थेपले मादी शाखामा यसअघि पनि दुई जना कर्मचारीमाथि कुटपिट तथा धम्की दिएका थिए  ।

कर्मचारीमाथि कुटपिट गर्ने दोषीमाथि कडा कारवाहीको माग गर्दै साउन २१ गते नेपाल राष्ट्रिय कर्मचारी सङ्गठन निजामती जिल्ला कार्यसमितिले प्रमुख जिल्ला अधिकारी ध्रुवबहादुर खड्कालाई ज्ञापनपत्र बुझाएको अध्यक्ष राईले बताउनु भयो । कर्मचारीमाथि कुटपिटमा संलग्न जोकोही भएपनि कारवाही हुने गरिने जिल्ला अधिकारी खड्काले बताउनु भयो । कुटपिटमा संलग्नलाई गिरफ्तार गरी कारवाही हुनेमा ढुक्क हुन प्रमुख जिल्ला अधिकारी खड्काले कर्मचारीहरूलाई आग्रह गर्नुभयो ।

मादीका लक्ष्मण लिङ्थेपको क्रसर उद्योगले ६ लाख ४० रुपियाँ बक्यौता नतिरेपछि नेपाल विद्युत प्राधिकरणले लाइन काटेको थियो । कर्मचारी माथि कुटपिट गरेको आरोपमा लिङ्थेप र लिम्बूविरूद्ध साउन १५ गते इलाका प्रहरी कार्यालय चैनपुरमा अभद्र वयवहार शीर्षकमा मुद्दा दर्ता भएको इन्स्पेक्टर बाबुराम कार्कीले बताउनु भयो । उजुरी लगत्तै फरार भएका आरोपितको खोजी भइरहेको इलाका प्रहरी कार्यालय, चैनपुरले जनाएको छ ।

कर्मचारी सङ्गठनले विज्ञप्ति निकालेर घटनाको विराेध गर्नुका साथै सुरक्षाको प्रत्याभूति दिलाउन माग गरेको छ ।

कर्मचारीमाथि कुटपिट भएपछि मादीमा रहेको शाखा कार्यालय साउन १५ गतेदेखि बन्द रहेको नेपाल विद्युत प्राधिकरण शाखा कार्यालयका प्रमुख शत्रुधन यादवले बताउनु भयो । उक्त शाखा कार्यालयमा ६ जना कर्मचारी कार्यरत थिए । मादीमा रहेको शाखा कार्यालय बन्द भएपछि सेवाग्राही मारमा परेका छन् ।

भविन कार्की