समाचारहरू

खाँदवारी नगरपालिका-८ स्थायी घर भइ नेपाल विद्युत प्राधिकरण कार्यालय, सङ्खुवासभाको शाखा कार्यालय मादीमा इञ्चार्जका रूपमा कार्यरत ३५ वर्षीय राजकुमार राई र मादी नगरपालिका-७ का ३० वर्षीय प्रदीप जिमीलाई कुटपिट घटनाका आरोपितविरूद्ध प्रहरीले मुद्दा दर्ता गरेको छ ।

प्राधिकरणका दुई जना कर्मचारीलाई कुटपिट गरेको आरोपमा प्रहरीले ४० वर्षीय लक्ष्मण लिङ्थेप र ३३ वर्षीय हर्कहाङ लिम्बूविरूद्ध इलाका प्रहरी कार्यालय, चैनपुरमा मुद्दा दर्ता गरिएको छ ।

कर्मचारी कुटपिटका घटनाका आरोपितविरूद्ध ०८१ साउन १५ गते मुद्दा दर्ता गरिएको इलाका प्रहरी कार्यालय, चैनपुरका इन्स्पेक्टर बाबुराम कार्कीले बताउनु भयो । आरोपितविरूद्ध अभद्र व्यवहार शीर्षकमा मुद्दा दर्ता गरिएको इन्स्पेक्टर कार्कीले बताउनु भयो । प्रहरीको उजुरीलगत्तै आरोपित फरार भएको प्रहरीले जनाएको छ ।

विद्युत लाइन काटिएको विषयमा विवाद हुदाँ नेपाल विद्युत प्राधिकरण शाखा कार्यालय, मादीमा कार्यरत राजकुमार राई र प्रदीप जिमीलाई साउन १४ गते गाली गलौज, हातपात तथा कुटपिट भएको थियो ।

लक्ष्मण लिङ्थेपको क्रसर उद्योगले ६ लाख ४० रुपियाँ बक्यौता नतेरेपछि नेपाल विद्युत प्राधिकरणले लाइन काटेको नेपाल विद्युत प्राधिकरण कार्यालय, संखुवासभाका प्रमुख शत्रुधन यादवले बताउनु भयो । लिङ्थेपले घर निर्माणका क्रममा पुन लाइन जडानका लागि दवाब दिने गरेका थिए । कर्मचारीमाथि कुटपिट भएपछि मादीमा रहेको शाखा कार्यालयमा साउन १५ गतेबाट बन्द रहेको नेपाल विद्युत प्राधिकरण कार्यालयका प्रमुख यादवले बताउनु भयो । उक्त शाखा कार्यालयमा ६ जना कर्मचारी कार्यरत थिए ।

मादीमा रहेको शाखा कार्यालय बन्द भएपछि सेवाग्राही मारमा परेका छन् । कर्मचारीमाथि कुटपिट भएपछि शाखा कार्यालय मादीमा कार्यरत अन्य कर्मचारीहरु डरले कार्यालय बन्द गरेर सदरमुकाम सरेका छन् ।

भविन कार्की