समाचारहरू

आठराई त्रिवेणी गाउँपालिकामा कार्यरत इञ्जिनियर र सहायक इञ्जिनियरमाथि हातपात घटना आरोपितलाई कारबाही गर्न माग गर्दै गाउँपालिकाका कर्मचारीले जिल्ला प्रशासन कार्यालयमा असार ८ गते ज्ञापनपत्र बुझाएका छन् ।

फुङलिङ नगरपालिका–३ का २५ वर्षीय इञ्जिनियर विशाल गुरुङ र इलामको सूर्योदय नगरपालिका–१ का स्थायी घर भई आठराई त्रिवेणी गाउँपालिकामा कार्यरत सहायक इञ्जिनियर २३ वर्षीय दिछेन शेर्पामाथि असार ७ गते हातपात गरेको आरोपमा पीडित पक्षले दोषीलाई कारबाही गर्न माग गर्दै ज्ञापनपत्र बुझाएको प्रमुख जिल्ला अधिकारी उमेश पाण्डेले बताउनु भयो ।

पीडितद्घय आठराई त्रिवेणी गाउँपालिका–१ निघुरादिनस्थित श्री परमसिंह माध्यमिक विद्यालय भवनको छत ढलानको असार ७ गते अनुगमन गर्न गएको अवस्थामा सोही वडाका वडासदस्य ४२ वर्षीय मल्लराज पोमू र विद्यालय भवन निर्माण समितिका अध्यक्ष ३९ वर्षीय नविन पोमूले हातपात गरेको पीडित पक्षको आरोप छ ।

पीडित पक्षले बुझाएको ज्ञापनपत्रमा आठराई त्रिवेणी गाउँपालिका–१ का ४५ वर्षीय कृष्णराज पोमू, ३६ वर्षीय कर्ण थुलङ, ५२ वर्षीय जैमान गुरुङ, १९ वर्षीय सन्दीप पोमू, ३४ वर्षीय असिम पोमू र ३२ वर्षीय सुमन पोमू संलग्न भएकाले उनीहरूलाई समेत कारबाही गर्न माग गरिएको छ ।

इञ्जिनियर र सहायक इञ्जिनियरसँग वडासदस्य मल्लराज पोमू र विद्यालय भवन निर्माण समिति अध्यक्ष नविन पोमूबिच निर्माण सामग्रीको विषयलाई लिएर विवाद भएपछि कर्मचारीमाथि हातपात भएको विद्यालयका प्रधानाध्यापक केशवप्रसाद निरौलाले बताउनु भयो ।

पीडित पक्षको ज्ञापनपत्र बुझेपछि प्रमुख जिल्ला अधिकारी उमेश पाण्डेले दोषीलाई कानुन बमोजिम कारबाही प्रक्रिया अघि बढाउने बताउनु भयो ।

कार्यस्थलमा खटिएका कर्मचारी असुरक्षित भएको भन्दै स्थानीय तह कर्मचारी सङ्घ प्रदेश १ उपाध्यक्ष कृष्णप्रसाद सुवेदी, नेपाल निजामती कर्मचारी यूनियन जिल्ला अध्यक्ष हेमराज कठायत, नेपाल निजामति कर्मचारी सङ्गठन अध्यक्ष युवराज पौडेल र नेपाल राष्ट्रिय कर्मचारी सङ्गठन अध्यक्ष नवराज गिरीले दोषीलाई कारबाही गर्न माग गरेका छन् ।

आठराई त्रिवेणी गाउँपालिका अध्यक्ष विश्वनाथ सिटौलाले कर्मचारीमाथि भएको घटनाका दोषीलाई कारबाहीका लागि सहयोग गर्ने र कर्मचारीहरूलाई भयरहित ढङ्गले काम गर्ने वातावरण मिलाउने बताउनु भएको छ ।

देवराज गुरुङ