समाचारहरू

कर्णाली राजमार्गमा दुई महिनायता १ सय ३३ स्थानमा पहिरो जाँदा यात्रा गर्ने यात्रुहरू गन्तव्यमा पुग्नै समस्या भएको छ ।

राजमार्गको विभिन्न ठाउँमा पहिरो गएर राजमार्ग अवरुद्ध हुँदा यात्रा गर्ने सयौँ यात्रुले दिनहुँ जसो सास्ती झेल्ने गरेका छन् । वर्षातको समयमा पानी पर्ना साथ राजमार्गका विभिन्न स्थानमा पहिरो गएर अवरुद्ध हुने गरेको छ । ०६३ चैत ३० गते सञ्चालनमा आएको सुर्खेत – जुम्ला राजमार्गमा वर्षायाम सुरु भएयता बारम्बार पहिरो गएर कहिले सडक एकतर्फी त कहिले बन्द नै गर्नुपरेको स्थानीयहरूको भनाइ छ । वातावरणीय प्रभाव र मूल्याङ्कन गरिए पनि समयमा काम सम्पन्न नहुँदा थप विनाश र बिपत्ति निम्तिएको छ भने दैनिक जनजीविकाको सवालमा समेत असर पुग्दै आएको छ ।

कर्णाली राजमार्ग अविरल वर्षाले प्रहरीको काम सडकमा बढी केन्द्रित भएको जिल्ला प्रहरी कार्यालय, कालिकोटका डिएसपी अर्जुन केसीले बताउनु भयो । वर्षातमा जोखिम मोलेर कर्णाली राजमार्गको यात्रा गर्नुपर्ने बाध्यता रहेको उहाँको भनाइ छ । कठिन भूगोलको कारण वर्षातको समयमा पानी पर्नासाथ ठाउँ–ठाउँमा पहिरो जाने र सडक अवरुद्ध हुने गर्दा यात्रुहरू समस्यामा परेको डिएसपी केसीले उल्लेख गर्नुभयो ।

जिल्ला ट्राफिक कार्यालय, कालिकोटका निमित्त इन्चार्ज झलक गिरीका अनुसार कालिकोटमा १ सय ३, दैलेखमा २३ र जुम्लामा सात ठाउँमा पहिरो जाँदा ३९ दिन कर्णाली राजमार्ग अवरुद्ध भएको थियो । कालिकोटको हुल्म, एस मोड, गगनेखोला, मोल्फा, गल्ली, टाकुल्ला, राचुली लगायतका स्थानमा पटक–पटक पहिरोले सडक अवरुद्ध भएको उहाँको भनाइ छ ।

कर्णाली राजमार्गमा वर्षेनी पहिरोले दुख दिँदै आएको जिल्ला प्रशासन कार्यालय, कालिकोटका प्रमुख जिल्ला अधिकारी गणेश नेपालीले बताउनु भयो । जिल्ला प्रशासनले सडक विभागसँग समन्वय गरेर तीन ओटा डोजर कालिकोट खण्डमा राखेको प्रमुख जिल्ला अधिकारी नेपालीले उल्लेख गर्नुभयो । उहाँका अनुसार कालिकोटको पिली, हुल्म र गगने खोलामा सडक विभागका डोजर छन् । ठूलो चट्टान खसेकाले साउन महिनाको पहिलो साता पहिरो हटाउन पाँच दिन लागे पनि अरु बेला दिनहुँ पहिरो पन्छाएर सडक सुचारु गरिएको प्रमुख जिल्ला अधिकारी नेपालीको भनाइ छ ।

इन्सेक कर्णाली प्रदेश कार्यालयले कर्णाली प्रदेशका विभिन्न जिल्लामा सार्वजनिक यातायात सेवाको गुणस्तर कमजोर भएको, यातायात सम्बन्धी मौजुदा कानुनको प्रभावकारी नहुँदा कर्णाली प्रदेशमा दिनहुँ हुने सवारी दुर्घटनाले जनधनको क्षति भएको र सवारी दुर्घटना हुने सक्ने सम्भाव्य कारणहरूलाई रोकथाम गरी नागरिकहरूको सम्मानपूर्वक बाँच्न पाउने हकको विषय सार्वजनिक हित र सरोकारको विषय भएको भन्दै निषेज्ञाधाको आदेश जारी गरी पाउँ भनि मुद्दा दायर गरेको थियो ।

कर्णाली प्रदेशमा बढ्दो सवारी साधन दुर्घटनाको रोकथाम तथा न्यूनीकरण लगायतको माग गर्दै उच्च अदालत, सुर्खेतमा परेको रिट निवेदनका विषयमा उच्च अदालत सुर्खेतले निवेदकको माग बमोजिमको अन्तरिम आदेश जारी गरेको थियो । उच्च अदालतका वरिष्ठतम न्यायाधीश कृष्णलाल भट्टराई र न्यायाधीश खडकबहादुर केसीको ०८१ वैशाख १८ गतेको इजलासले सवारी दुर्घटना रोकथाम तथा नियन्त्रणका लागि आवश्यक र उपर्युक्त व्यवस्था गर्न विपक्षीहरूका नाममा अन्तिम फैसला सुनाएको थियो ।

पूर्ण सार्की