समाचारहरू

स्थानीय तहको निर्वाचनका लागि कर्णाली प्रदेशमा रहेका २५ नगरपालिका, ५४ गाउँपालिका र ७ सय १८ वडापालिकाका लागि आवश्यक ३ हजार ७ सय ४८ जना जनप्रतिनिधिका लागि १३ हजार ४ सय ३ जनाको उम्मेदवारी दर्ता भएको छ ।

निर्वाचन आयोगले प्रकाशित गरेको सूचना अनुसार २५ जनाको नगरप्रमुख पदका लागि १ सय ७६ जना र २५ जना नगर उपप्रमुख पदका लागि १ सय ६० जनाको उम्मेदवारी दर्ता भएको हो ।

त्यसैगरी ५४ जना गाउँपालिका अध्यक्ष पदका लागि ३ सय ८ जना, ५४ जना गाउँपालिका उपाध्यक्षका लागि २ सय ८८ जनाको उम्मेदवारी दर्ता भएको छ । ७ सय १८ जना वडाअध्यक्षका लागि ३ हजार २ सय ७ जनाको उम्मेदवारी दर्ता भएको छ ।

७ सय १८ जना महिला सदस्य पदका लागि २ हजार ३ सय २८ जना, ७ सय १८ जना दलित महिला सदस्यका लागि १ हजार ९ सय ९८ जना र १ हजार ४ सय ३६ जना खुल्ला सदस्य पदका लागि ४ हजार ९ सय ३८ जनाको मनोनयन दर्ता भएको छ । मनोनयन दर्ता भएका उम्मेदवार विरुद्धको दावि विरोधको समय वैशाख १३ गते तोकिएको थियो ।

दावि विरोधपछि यो सङ्ख्या घटबढ हुन सक्ने निर्वाचन आयोगले जनाएको छ । निर्वाचन आयोगको निर्वाचन कार्यतालिका अनुसार वैशाख १४ र १५ गते मनोनयन पत्र जाँच तथा उजुरी उपर जाँजबुझ तथा निर्णय र वैशाख १५ गते मनोनयन भएका उम्मेदवारहरूको नामावली प्रकाशन गरिनेछ ।

वैशाख १६ गते उम्मेदवारको नाम फिर्ता तथा उम्मेदवारहरूको अन्तिम नामावली प्रकाशन गरिनेछ । आयोगले वैशाख १७ गते दल तथा स्वतन्त्र उम्मेदवारहरूका लागि चुनाव चिन्ह प्रदान गर्ने निर्वाचन कार्यतालिका रहेको छ ।

रुकुम पश्चिम जिल्ला प्रतिनिधि मनिषा केसीका अनुसार जिल्लामा १ हजार ९९ जनाको उम्मेद्वारी दर्ता भएको छ । रुकुम पश्चिममा नेकपा एमाले, नेपाली काँग्रेस, नेकपा माओवादी केन्द्र, नेकपा एकीकृत समाजवादी र राष्ट्रिय प्रजातन्त्र पार्टीले उम्मेद्वारी दर्ता गराएका छन् ।

जिल्लाभरी १ हजार ९९ जनाले उम्मेद्वारी दर्ता गराएको जिल्ला निर्वाचन कार्यालयका प्रमुख कुमारी रिमा मल्लले जानकारी दिनुभयो ।

जुम्लाको दुई पालिकामा मात्रै प्रमुखमा महिला उम्मेदवारी
जुम्ला जिल्ला प्रतिनिधि मानदत्त रावलका अनुसार जिल्लामा एक नगरपालिका र सात गाउँपालिका छन् । यहाँका आठ स्थानीय तहमध्ये दुई पालिकामा मात्रै प्रमुखमा महिलाले उम्मेदवारी दिनु भएको छ ।

अघिल्लो ०७४ को स्थानीय तहको निर्वाचनमा चन्दननाथ नगरपालिकामा नेपाली काँग्रेसले कान्तिका सेजुवाललाई मात्रै नगरप्रमुखको उम्मेदवार बनाएको थियो । उहाँ नगरप्रमुखमा पुरुषसँग प्रतिष्प्रधा गर्दा विजयी हुनु भयो ।

यसवर्ष ०७९ को स्थानीय तहको निर्वाचनमा चन्दननाथ नगरपालिकाको नगरप्रमुखमा चन्दननाथ–७ की २८ वर्षीया जयालक्ष्मी चौलागाईले उम्मेदवारी दिनु भएको छ । ंउहाँले एकीकृत समाजवादी पार्टीबाट नगरप्रमुख पदमा उम्मेदवारी दिनु भएको हो ।

नगर उपप्रमुखमा समाजवादीले भीम थापालाई उम्मेदवारीको मनोनयन दर्ता गरेको मुख्य निर्वाचन अधिकृतको कार्यालय जुम्लाले जनाएको छ ।

यस्तै नेकपा एमाले जुम्लाले गुठिचौर गाउँपालिकामा महिलालाई अध्यक्षको उम्मेदवार बनाएको छ । झुनमाया जैसीले एमालेको तर्फबाट अध्यक्षमा उम्मेदवारी दिएकी हुन् ।

जुम्लामा ३ सय १६ पदका लागि १ हजार ४ सय ४३ जनाको उम्मेदवारी
स्थानीय तहको निर्वाचनका लागि जुम्लामा ३ सय १६ पदका लागि १ हजार ४ सय ४३ जनाको उम्मेदवारी परेको छ । एक नगरपालिका र सात गाउँपालिका गरी आठ स्थानीय तहमा ३ सय १६ जना जनप्रतिनिधिको आवश्यकता हो । तर यहाँ १ हजार ४ सय ४३ जनाले उम्मेदवारी दिएका छन् ।

जुम्लाको एक मात्र चन्दननाथ नगरपालिकामा ५२ पदका लागि २ सय ६८ जनाले उम्मेदवारी दिएका छन् । नगरप्रमुख, उप्रमुख, वडाध्यक्ष, दलित सदस्य, महिला सदस्य र खुला सदस्य गरी ५२ पदका लागि २ सय ६८ जना मध्ये ५४ जना महिलाले उम्मेदवारी दिएका हुन् ।
एक नगरप्रमुखका लागि नौ जना मध्ये एक जनाले उम्मेदवारी दिएका छन् भने एक नगर उपप्रमुखका लागि आठ जना मध्ये ६ जना महिलाले उम्मेदवारी दिएका छन् ।

यस्तै नगरपालिका १० वडामा विभाजित छ । १० वडाध्यक्षको पदका लागि ७० जना मध्ये ३ जना महिलाको उम्मदवारी परेको छ ।

नगरपालिकाको १० वडामध्ये सवै भन्दा बढी १० नम्बर वडामा १० जनाको उम्मेदवारी परेको छ । सवै भन्दा कम ६ नम्बर वडामा ४ जनाको उम्मेदवारी परेको मुख्य निर्वाचन अधिकृतको कार्यालय जुम्लाले जनाएको छ ।  सदस्यमा १० वडाबाट ९४ जना मध्ये चार जनाको उम्मेदवारी परेको छ भने महिला सदस्यमा ४७ जनाको उम्मेदवारी परेको मुख्य निर्वाचन अधिकृतको कार्यालय जुम्लाका सहायक मुख्य निर्वाचन अधिकृत तोयानाथ उपाध्यायले बताउनु भयो ।

तिला गाउँपालिकामा ४७ पदका लागि १ सय ९९ जनाले उम्मेदवारी दर्ता गराएका छन । पालिकाको अध्यक्ष पदका लागि ६ जनाले मनोनयन दर्ता गराएको निर्वाचन अधिकृत निर्मला कुमारी खडकाले बताउनु भयो । उपाध्यक्ष एक पदका लागि ८ जनाले उम्मेदवारी दर्ता गराएका हुन् । निर्वाचन अधिकृत खड्काका अनुसार ९ वटा वडाध्यक्ष पदमा ४७ जनाको उम्मेदवारी परेका छन् । १८ वटा महिला वडा सदस्यमा ३८ जनाको मनोनयन परेको छ । त्यस्तै ९ जना खुला वडा सदस्यमा ७५ जनाको उम्मेदवारी दर्ता भएको छ । नौ वटा दलित महिला वडा सदस्यका लागि २५ जनाले उम्मेदवारी दिएका छन् ।

तातोपानी गाउँपालिकामा ४२ पदका लागि १ सय ८३ जनाको उम्मेदवारी परेको छ । पालिकाको अध्यक्ष पदमा ८ जनाको उम्मेदवारी परेको निर्वाचन अधिकृत सरोजराज रेग्मीले बताउनु भयो । त्यस्तै उपाध्यक्ष पदका लागि सात जनाले मनोनयन दर्ता गराएको उहाँले बताउनु भयो । वडाध्यक्ष ८ वटा पदका लागि ४२ जनाले उम्मेदवारी दिएका छन् । निर्वाचन अधिकारी रेग्मीका अनुसार १६ जना खुला वडा सदस्य पदमा ६८ जनाले मनोनयन दर्ता गरेका छन् । त्यस्तै ८ जना महिला सदस्य पदमा ३३ जनाले उम्मेदवारी दिएका छन् । १ वटा दलित महिला वडा सदस्यमा २४ जनाले मनोनयन दर्ता गरेका छन् ।

हिमा गाउँपालिकामा ३७ पदका लागि १ सय ९७ जनाको उम्मेदवारी परेको छ । गाउँपालिका अध्यक्ष पदमा ७ जनाको उम्मेदवारी परेको निर्वाचन अधिकृत रितु राईले बताउनु भयो । त्यस्तै उपाध्यक्ष पदका लागि उपाध्यक्ष ९ जनाले मनोनयन दर्ता गराएको उहाँको भनाइ छ । वडाध्यक्ष ७ पदका लागि ५४ जना मध्ये महिला २ जना र पुरुष ५२ जनाको उम्मेदवारी परेको छ । राईका अनुसार खुला वडा सदस्य १४ पदका लागि ७० जनाले मनोनयन दर्ता गराएका छन् । यसमा महिला १६ र पुरुष ५४ जनाले उम्मेदवारी दिएका छन । यस्तै महिला सदस्य एक पदका लागि ३७ जनाको उम्मेदवारी परेको छ । त्यस्तै दलित महिला वडा सदस्य एक पदका लागि २० जनाको उम्मेवारी परेको छ ।

गुठीचौर गाउँपालिका जुम्लामा २७ पदका लागि १ सय १२ जनाको उम्मेदवारी परेको छ । पालिकाको अध्यक्ष पदका लागि ६ जनाको उम्मेदवारी परेको निर्वाचन अधिकृत शम्भु गौतमले बताउनु भयो । त्यस्तै उपाध्यक्ष पदमा ६ जना, वडाध्यक्ष ५ पदमा २६ जना, खुला वडा सदस्य १० पदमा ४० जना, महिला वडा सदस्य ५ पदमा २० जना र दलित महिला वडा सदस्य ५ पदमा १४ जनाले मनोनयन दर्ता गराएको उहाँले बताउनु भयो ।

पातारासी गाउँपालिकामा ३७ पदका लागि १ सय १४ जनाको उम्मेदवारी परेको छ । पालिकाको अध्यक्ष पदका लागि ७ जनाको उम्मेदवारी परेको निर्वाचन अधिकृत सुरेश सुनारले बताउनु भयो । त्यस्तै उपाध्यक्ष पदमा ७ जनाको उम्मेदवारी परेको छ । वडाध्यक्ष ७ पदमा ३१ जनाले उम्मेदवारी दिएका छन् । खुला वडा ३८ जना महिला वडा सदस्य २३ जना र दलित महिला वडा सदस्य ८ जनाले मनोनयन दर्ता गराएका छन् ।

सिजा गाउपालिकामा ३२ पदका लागि १ सय ९२ जनाको उम्मेदवारी परेको छ । पालिकाको अध्यक्ष पदका लागि सात जनाको उम्मेदवारी परेको निर्वाचन अधिकृत कर्ण बहादुर महतले बताउनु भयो । उपाध्यक्ष एक पदमा ७ जनाको उम्मेदवारी परेको छ । त्यस्तै ६ पदका लागि वडाध्यक्षमा ३९ जनाले उम्मेदवारी दिएका छन् । खुला वडा सदस्यमा ५८ जना, .महिला वडा सदस्य ३३ जना र दलित महिला वडा सदस्य २८ जनाले मनोनयन दर्ता गराएका छन् ।

कनकासुन्दरी गाउँपालिकामा ४२ पदका लागि १ सय ९४ जनाको उम्मेदवारी परेको छ । पालिकाका अध्यक्ष पदका लागि ९ जनाको उम्मेदवारी परेको निर्वाचन अधिकृत जागुराम चौधरीले बताउनु भयो । उपाध्यक्ष पदमा ८ जनाको उम्मेदवारी परेको छ । त्यस्तै ८ पदको लागि वडाध्यक्षमा ४७ जनाले उम्मेदवारी दिएका छन् । खुला वडा सदस्य ७४ जना महिला वडा सदस्य ३२ जना र दलित महिला वडा सदस्य २४ जनाले मनोनयन दर्ता गराएका छन् ।

इन्सेक कर्णाली प्रदेश कार्यालय, सुर्खेत