समाचारहरू

सुरक्षाका दृष्टिकोणले कर्णाली प्रदेशमा करिब तीन सय मतदानस्थल अति संवेदनशील मानिएका छन् । आगामी वैशाख ३० गते हुने स्थानीय तहको निर्वाचनका लागि दुई सय ९५ वटा मतदानस्थल अति संवेदनशील मानिएका हुन् ।

प्रदेशको निर्वाचन सुरक्षा समितिले तयार पारेको प्रतिवेदन अनुसार सबैभन्दा बढी अति संवेदनशील मतदानस्थल कालिकोट जिल्लामा रहेको छ । कालिकोटमा ७३ ओटा मतदानस्थल अति संवेदनशील मानिएका छन् ।

सुर्खेतका २० वटा मतदानस्थल, दैलेखका ४६ वटा, सल्यानमा ३८ वटा, जुम्ला ४० वटा, मुगु २६ वटा, रुकुमपश्चिममा १९ वटा, डोल्पामा २३ वटा र जाजरकोटमा एउटा मतदानस्थल अति संवेदनशील रहेको प्रदेश निर्वाचन कार्यालयका प्रमुख दुर्गा प्रसाद चालिसेले जानकारी दिनुभयो ।

त्यस्तै, निर्वाचन कार्यालयका अनुसार चार सय १४ मतदानस्थल संवेदनशील रहेका छन् । सुर्खेतका ८५ वटा, दैलेखका ५५ वटा, सल्यानका ६० वटा, रुकुमपश्चिमका ४५ वटा, डोल्पाका २६ वटा, हुम्लाका ३० वटा, जुम्लाका १४ वटा, मुगुका १९ वटा, कालिकोटका २६ वटा र जाजरकोटका ५४ वटा मतदानस्थल संवेदनशील देखिएका छन् ।

प्रदेशभर एक सय ९८ वटा मतदानस्थल भने सामान्य रहेका छन् । कर्णालीमा आगामी निर्वाचनका लागि प्रदेश भर नौ सय सात मतदानस्थल र एक हजार तीन सय ८५ वटा मतदान केन्द्र निर्धारण गरिएको छ ।

जाजरकोट जिल्ला प्रतिनिधि दिनेश कुमार श्रेष्ठका अनुसार जिल्ला सुरक्षा समितिको टोलीले जाजरकोटका सात ओटै स्थानीय तहमा पुगेर पायक पर्ने मतदानस्थल र संवेदनशीलताबारे अध्ययन गर्ने क्रममा जाजरकोटमा एक ओटा मतदानस्थल अति संवेदनशील रहेको जनाएको छ ।

सरकारले आगामी वैशाख ३० गते स्थानीय तहको निर्वाचन घोषणा गरेसँगै आवश्यक सम्पुर्ण तयारीका लागी जिल्लामा रहेका सरोकारवाला निकाय जुटेका छन् ।

आगामी निर्वाचनका लागि तोकिएका ८५ ओटा मतदानस्थल मध्ये एक ओटा मतदान स्थल अति संवेदनशील देखिएको प्रमुख जिल्ला अधिकारी राम बहादुर शाहीले जानकारी दिनु भयो ।

उहाँका अनुसार ५४ ओटा मतदानस्थल संवेदनशील र ३० ओटा मतदानस्थल सामान्य रहेका छन् । निर्वाचनका लागि मतदानस्थल र केन्द्र उपयुक्त स्थानमा छन् या छैनन् र सुरक्षाका हिसावले कति जोखिम छन्, छैनन् भन्ने अध्ययन समेत गरिसकिएको प्रजिअ शाहीले बताउनु भयो ।

संवेदनशील भएका मतदानस्थलहरूमा कस्तो सुरक्षा व्यवस्थापन मिलाउने भन्नेबारे सुरक्षा निकायसहित स्थानीय तहहरूसँग समन्वय भइरहेको उहाँको भनाइ छ । सुरक्षा समितिले वर्गीकरण गरेका मतदानस्थलको नाम भने सुरक्षा संवेदनशीलतालाई ध्यानमा राखेर सार्वजनिक गरिएको छैन ।

जिल्ला निर्वाचन अधिकृत नृपराज उपाध्यायका अनुसार ८५ ओटा मतदान स्थल रहेको जाजरकोट जिल्लामा हाल मतदाता सङ्ख्याको आधारमा मतदानस्थल कुनै थपघट गरिएको छैन ।

जाजरकोट जिल्लामा आसन्न स्थानीय तहको निर्वाचन ०७९ वैशाख ३० का लागि सात वटै स्थानीय तह बाट ४९ हजार ९ जना पूरुष र ५४ हजार ८ सय ५८ जना महिला समेत गरी एक लाख तीन हजार ८ सय ६९ जनाले मतदान गर्ने छन् ।

 

पूर्णबहादुर खड्का/दिनेश कुमार श्रेष्ठ