समाचारहरू

कर्णाली प्रदेश सरकारको मुख्यमन्त्री जीवनबहादुर शाहीसंग इन्सेककी अध्यक्ष डा. इन्दिरा श्रेष्ठ नेतृत्वको टोलीले मानव अधिकार अवस्थाको विषयमा छलफल गरेको छ ।

चैत १० गते मुख्यमन्त्री तथा मन्त्रिपरिषद्को कार्यालयमा पुगेर अध्यक्ष श्रेष्ठसहितको टोलीसँग मुख्यमन्त्री शाहीले मानव अधिकारको रक्षाका लागि सरकार समन्वय र सहकार्य गर्न प्रतिबद्ध रहेको बताउनु भयो ।

संविधानले व्यवस्था गरेको नागरिकको अधिकार पनि राज्यले दिन नसकेको भन्दै मानव अधिकार संरक्षणका लागि प्रतिबद्ध रहेको बताउँदै इन्सेकले नागरिकको सरल जीवन जीउन महत्वपूर्ण भूमिका खेलेको बताउनु भयो ।

नेपाल मानव अधिकार वर्ष पुस्तक २०२२ ग्रहण गर्दै मुख्यमन्त्री शाहीले मानव अधिकार उल्लङ्घन र ज्यादतीका घटनाको सङ्कलन र विश्लेषणले भविष्यमा मानव अधिकारको अवस्थाको अभिलेख हुने बताउनु भयो ।

मानव अधिकार उल्लङ्घन र ज्यादतीका घटनामा कमी ल्याउन सरकारसँग सहकार्य भए मानव अधिकारको संरक्षणमा थप सुधार हुने भन्दै अध्यक्ष श्रेष्ठले समग्र मानव अधिकारको अवस्थाका बारेमा जानकारी गराउनु भयो ।

विशेषगरी राज्यपक्षबाट हुने मानव अधिकार उल्लङ्घन र ज्यादतीका घटनाहरूमा शून्यमा झार्न सरकार लाग्नुपर्ने भन्दै ‘समृद्ध कर्णाली, सुखारी कर्णालीवासी’ नारा लिएको प्रदेश सरकारसँगै काम गर्न इन्सेक तयार रहेको अध्यक्ष श्रेष्ठको भनाइ थियो ।

सशस्त्र द्वन्द्वका समयदेखि नै मानव अधिकारको संरक्षणका लागि इन्सेकले काम गर्दै आएकोमा हाल शिक्षा, स्वास्थ्य, खाद्य लगाएतको क्षेत्रमा सचेतनाको काम गरिरहेको अध्यक्ष श्रेष्ठले जानकारी गराउनु भयो ।

कर्णाली प्रदेशसभाका सभामुख राजबहादुर शाहीसँग पनि छलफल गरिएको छ । इन्सेक अध्यक्ष सहितको टोलीसँग सभामुख शाहीले मानव अधिकार रक्षाका लागि निर्माण गरिने कानुनको विषयमा थप पहल लिने बताउनु भयो ।

मानव अधिकार रक्षक नै असुरक्षित रहेको भन्दै मानव अधिकारमैत्री कानुन निर्माणमा इन्सेकसँग सहकार्य गरेर काम गर्ने बताउनु भयो ।

सशस्त्र द्वन्द्वदेखि नै इन्सेकले महत्वपूर्ण भूमिका खेलेको भन्दै इन्सेकको प्रशंसक रहेको सभामुख शाहीको भनाइ छ ।

सभामुख शाहीलाई मानव अधिकार वर्ष पुस्तक २०२२ हस्तान्तरण गर्दै इन्सेक अध्यक्ष श्रेष्ठले मानव अधिकार उल्लङ्घन र ज्यादतीका घटना भयावह अवस्थामा रहेको भन्दै मानव अधिकारमैत्री कानुन निर्माणमा जोड दिन आग्रह गर्नु भयो ।

मुख्यमन्त्री शाही र सभामुख शाहीसँगको छलफलमा अध्यक्ष श्रेष्ठसहित इन्सेक कर्णाली प्रदेश संयोजक नारायण सुवेदी, इन्सेकका निर्देशक मदन पौडेललगायत सहभागी हुनु भएको थियो ।

पूर्णबहादुर खड्का