करारका कर्मचारीद्वारा वडा कार्यालयमा तालाबन्दी

  ०८० भदौ १२ गते

मेन्छयायेम गाउँपालिका-१ मा कार्यरत करारका कर्मचारी खेमनाथ गौतमलाई गाउँपालिकाले हटाएको विरोधमा करारका कर्मचारीले वडा कार्यालयमा तालाबन्दी गरेका छन् ।

करारका कर्मचारी हटाएको विरोधमा करार सेवामा कार्यरत कर्मचारीले मेन्छयायेम गाउँपालिका-१ को वडा कार्यालयमा १५ दिनयता तालाबन्दीलाई जारी राखेका छन् ।

गाउँपालिकाले ०८० साउन २९ गते करारका कर्मचारी खेमनाथ गौतमको म्याद नवीकरण नगरेपछि सोही मितिदेखि करारका कर्मचारीले मेन्छयायेम गाउँपालिका-१ वडा कार्यालयमा तालाबन्दी गरेका हुन् ।

तालाबन्दी गरेको दुई साता बितेपनि करारका कर्मचारीको आन्दोलन र स्थानीय सरकारले समस्या समाधानका लागि चासो नदिँदा सेवाग्राही समस्यामा परेका छन् ।

फरक पाटी्र्रमा आस्था राख्ने कर्मचारी राजनीतिक पूर्वाग्राही सोच राखेको आरोपमा नेपाली कांग्रेस मेन्छयायेम गाउँपालिका-१ समिति  र नेकपा माओवादी केन्द्र मेन्छयायेम गाउँपालिका-१ कमिटिले साउन २९ गते वडा कार्यालयमा ताला लगाएको  गाउँपालिका उपाध्यक्ष गीता गौतमले बताउनु भयो ।

नियमित रूपमा काम गरिरहेकै अवस्थामा करारमा नियुक्त भएका वडाका कर्मचारी खेमनाथ गौतमलाई एक्कासी गाउँपालिकाले हटाएकोले विनाशर्त पुर्नवहाली नगरेसम्म ताला नखुल्ने नेपाली कांग्रेस वडा सभापति जनिकुमार लिम्बूले बताउनु भयो ।

वडा कार्यालयमा कार्यालय सहयोगी पदमा कार्यरत खेमनाथ गौतम उक्त अवधिमा कार्यालयमा विना जानकारी १६ दिनसम्म हाजिर नभएको हुँदा निजलाई उल्लेखित कार्यविधि अनुसार ०८० भदौ १ गते देखि लागू हुने गरी करार अवधि थप नगरिएको गाउँपालिका अध्यक्ष यादवबहादुर खापुङ्गले बताउनु भयो ।

मेन्छयायेम गाउँपालिकाले समस्या समाधानका लागि प्रेस विज्ञप्ति जारी गरी आन्दोलनरत पक्षसँग सम्वादका माध्यमबाट समस्या समाधान गर्न आग्रह गरेको छ ।

आन्दोलनरत पक्ष र स्थानीय सरकारबिच समस्या समाधानका लागि भदौ ८ गते वार्ता भएको भएपनि निश्कर्षमा पुग्न नसकिएको नेपाली कांग्रेस वडा सभापति जनिकुमार लिम्बूले बताउनु भयो ।

कार्यालय सहयोगी खेमनाथ गौतमको पक्षमा आन्दोलनरत करारका कर्मचारीले करारमा नियुक्त भएका सबै कर्मचारीलाई हटाउन वा गौतमलाई पुर्नवहालीको माग राखेका छन् ।


सुरेश खत्री