समाचारहरू

नेत्रविक्रम चन्द नेतृत्वको नेपाल कम्युनिष्ट पार्टीका कार्यकर्ताले असार ११ गते जिल्लाका दुई स्थानमा बम विष्फोट गराएको प्रहरीले जनाएको छ ।

मदाने गाउँपालिका-७ को दिपक माविको बुथ नजिक र वडा नम्बर ६ को बुथ नजिकै राति बम विष्फोट भएको प्रहरीले जनाएको छ ।

असार ११ गते राति यहाँका नागरिकलाई आतङ्कित पार्न गाउँनै थर्किने गरी बम पड्किएको मतदान अधिकृत ताराबहादुर राउतले बताए । 'राति गाउँ नै थर्किएको थियो । के पडकाए भनेर हेर्न जाँदैछौ ।'-उनले भने-'बम नै हो वा अन्य विष्फोटक पदार्थ थाहा भएन ।'

त्यस्तै उक्त समूहले सोही गाउँपालिकाको टिम्मुरखर्क मतदान केन्द्र नजिकै पनि विष्फोटक पदार्थ विष्फोट गराएको जनाइएको छ । राति सो स्थानमा भएको विष्फोट बम हो वा अरू भन्ने अनुसन्धान भइरहेको सशस्त्र प्रहरीका जिल्ला प्रमुख दिग्वीजय सुवेदीले बताए ।

घटनामा संलग्नलाई तत्काल खोजी गरेर गिरफ्तार गर्न मातहतका प्रहरीलाई निर्देशन दिइएको जिल्ला प्रहरी प्रमुख भोला रावलले बताए । निर्वाचन विरोधी अभियानमा रहेको नेपाल कम्युनिष्ट पार्टीले यसअघि पनि जिल्लाका विभिन्न गाउँपालिकामा साइनबोर्ड फाल्ने र आफ्नो झण्डा राख्ने जस्ता गतिविधि गरेको थियो ।

टोपलाल अर्याल