समाचारहरू

इन्सेकका अध्यक्ष डाक्टर कुन्दन अर्यालले कमजोर वर्गको अवस्था सुधार्न र उनीहरूलाई मानव अधिकारमा पहुँच पुर्‍याउन इन्सेक अभियान जारी रहने बताउनु भएको छ ।

इन्सेक प्रदेश १, कार्यालयले फागुन १७ गते विराटनगरमा आयोजना गरेको मानव अधिकार र मानवीय अवस्था विषयक अन्तरक्रिया कार्यक्रममा इन्सेक अध्यक्ष डा.अर्यालले मानव अधिकारका दृष्टिकोणबाट नेपालमा कमजोर वर्गको अवस्था सुध्रान आवश्यक रहेको बताउनु भयो ।

उहाँले इन्सेकले प्रमाणका आधारमा नेपालमा मानव अधिकार उल्लङ्घन र ज्यादतीका घटनालाई वर्ष पुस्तकमार्फत दस्तावेजीकरण गर्दै आएको र सोही दस्तावेजीकरणका आधारमा नेपालमा कमजोर वर्ग मानव अधिकारको पहुँच प्राप्तिबाट टाढै देखिएकाले उनीहरूको अवस्था सुधार्न आवश्यक रहेको बताउनु भयो ।

अध्यक्ष अर्यालले हिरासत वा कारागार मृत्यु घटना केही कम भएपनि अन्त्य नभएको बताउनु भयो । उहाँले अहिले पनि समिति वर्गको स्वार्थका लागि कमजोर वर्ग पीडित भएको बताउनु भयो ।

अध्यक्ष अर्यालले विगतमा भन्दा नेपालमा मानव अधिकारका घटनाको प्रकृति बदलिँदै गएको र कमजोर वर्ग सबैभन्दा पीडित भएको बताउनु भयो । उहाँले घरेलु हिंसा, लैङ्गिक हिंसाका घटनामा कमजोर वर्ग पीडित भएको बताउनु भयो ।

अध्यक्ष अर्यालले अब इन्सेकले कमजोर वर्गको मानव अधिकार प्राप्तिका लागि अभियानहरू सञ्चालन गर्ने बताउनु भयो ।

परम्परादेखि कमजोर बनाइएका वर्गको अवस्था सुधार गर्न विशेष ध्यान दिनुपर्ने आवश्यकता रहेकाले आगामी दिनमा इन्सेकको अभियान सोही दिशामा केन्द्रीत हुने अध्यक्ष अर्यालले बताउनु भयो । उहाँले पम्परागत सामाजिक कुप्रथा विरुद्ध र नागरिकका आर्थिक, सामाजिक तथा सांस्कृतिक अधिकारका विषयमा सरकारको विशेष ध्यान जान आवश्यक रहेको बताउनु भयो । उहाँले भन्नुभयो‘नागरिकका आर्थिक, सामाजिक तथा सांस्कृतिक अधिकारका विषयलाई सबै पक्षले  विषेश ध्यान दिन जरूरी देखिएको छ ।’

अध्यक्ष अर्यालले न्यायप्राप्तिको प्रक्रिया जटिल हुँदा न्याय पाउनबाट धेरै नागरिक वञ्चित भएको र राज्यले कानुन बनाए पनि कानुन कार्यान्वयन प्रभावकारी नहुँदा मानव अधिकार उल्लङ्घन तथा ज्यादतीका घटनामा अझै पनि पीडितहरूले न्याय नपाएको बताउनु भएको छ ।

सो अवसरमा नेपाल मानव अधिकार वर्ष पुस्तक २०२२ का लागि मानव अधिकार उल्लङघन तथा ज्यादतीका घटनाको प्रदेशमा उत्कृष्ट अभिलेखीकरण गर्नु भएका इन्सेक धनकुटा प्रतिनिधि ईश्वर थापालाई नगद सात हजार रुपियाँ, उत्कृष्ट प्रतिनिधि उल्लेख भएको इन्सेकको लोगो र प्रशंसापत्रले सम्मान गरिएको इन्सेक प्रदेश १, प्रमुख सोमराज थापाले बताउनु भएको छ ।

विनोद सुवेदी