समाचारहरू

ढकारी गाउँपालिका–१ स्थित विश्वज्योति आधारभूत विद्यालयमा अध्ययनरत एक जना छात्रालाई 'बोक्सी' लागेर बिरामी परेको भन्दै विद्यालय कोठा भित्रै यातना दिएको भिडिओ सामाजिक सञ्जालमा प्रकाशित गरिएको छ ।

स्थानीय रमेशप्रसाद जैशीले फेसवुकमार्फत सार्वजनिक गरिएको भिडियाेमा दुई जना छात्रलाई देवता कमाउन लगाएर छात्रामाथि लछारपछार गरिएको छ ।

विद्यालयमा के कारणले बालिकाको शरीर कम्पन भएर मुर्छा पर्ने समस्या देखिएको हो यस सम्बन्धमा सम्बन्धित निकायको ध्यान जान आवश्यक रहेको भन्दै स्थानीय जैशीले  भिडियाे सहित सामाजिक सञ्जालमा लेख्नुभएको छ ।

जैशीले सार्वजनिक गर्नुभएको भिडियाेमा छात्रालाई भूत लागेको भनेर केही छात्राको आवाज पनि सुनिएको, दुई जना छात्रलाई देवता आएको भन्दै छात्रालाई लछारपछार गरेको दृष्यसँगै शिक्षकहरु पनि देखुनुभएकोले यस घटनाको अनुसन्धान सुरु गरिएको जिल्ला प्रहरी कार्यालय,अछामका इन्स्पेक्टर अजुर्न साउदले बताउनु भयो ।

घटनाका बारेमा जानकारी लिनका लागि विद्यालयका प्रधानाध्यापक बद्री रिमालसँग सम्पर्क हुन नसकेपछि ढकारी प्रहरी चौकीबाट प्रहरी खटाइएको इन्स्पेक्टर साउदले बताउनु भयो ।

तपेन्द्र कुँवर