'बोक्सी' भन्दै अमानवीय व्यवहार गर्ने आरोपित हाजिर

  ०८१ असार १६ गते

राजविराज नगरपालिका-१ शिवथानकी ४८ वर्षीया कैली देवी यादवलाई 'बोक्सी' भनेर मलमुत्र र फोहोर विष्टा खुवाउन खोजी कुटपिट गरेको आरोपमा फरार रहेका सोही ठाउँका ६८ वर्षीय फुलचन्द्र यादव ०८१ असार १६ गते जिल्ला अदालतमा हाजिर भएका छन् ।

जिल्ला अदालतमा हाजिर भएका आरोपित यादव न्यायाधीश दीपककुमार दाहालको इजलासबाट १० हजार रुपियाँ धरौटीमा रिहा भएको अदालतले जनाएको छ ।

यसअघि आरोपित राजविराज नगरपालिका-१ शिवथानकी ४९ वर्षीया बिणा भनिने लुखियादेवी यादव असार ५ गते न्यायाधीश तिलकबहादुर कार्कीको इजलासबाट ३५ हजार रुपियाँ धरौटीमा रिहा भएकी थिइन् ।

अदालतमा हाजिर भएकी आरोपित ३४ वर्षीया सुनिता देवी यादव न्यायाधीश मणिराम न्यौपानेको इजलासबाट ०८१ असार २ गते १८ हजार रुपियाँ धरौटी राखेर पुर्पक्षका लागि तारेखमा रिहा भएकी थिइन् ।

अदालतमा हाजिर भएका सुनिताका पति ३५ वर्षीय बितवा भनिने हरेराम यादव न्यायाधीश संजिव पोखरेलको इजलासमा जेठ ३० गते २५ हजार रुपियाँ धरौटी राखेर पुर्पक्षका लागि तारेखमा रिहा भए । अर्का आरोपित फुलचन्द्रका बुहारी सोबिता जेठ २८ गते न्यायाधीश उद्वीर नेपालीको इजलासबाट ३५ हजार रुपियाँ धरौटीमा रिहा भइन् ।

आरोपित सोबिताका पति सुरेन्द्र र विणाका पति चन्देश्वर ०८० चैत २१ गते गिरफ्तार भएका थिए । जिल्ला अदालतमा वैशाख १० गते अभियोग पत्र दायर भएकोमा न्यायाधीश श्यामबिहारी मौर्यको इजलासले वैशाख १२ गते फुलचन्द्रका छोरा सुरेन्द्र र लुखियाका पति चन्देश्वर पुर्पक्षका लागि कारागारमा थुनामा छन् । पछिल्लो पटक फुलचन्द्र हाजिर भएपछि कथित बोक्सी मुद्दाका सबै आरोपित हाजिर भएको अदालतले जनाएको छ ।

आरोपितहरूले ०७९ चैत २९ गते जग्गा जमिनको विषयमा घेरा हाली बोक्सी भन्दै मलमुत्र र फोहोर विष्टा खुवाउन खोज्दै कुटपिट गरेको पीडितले बताउनु भयो । जिल्ला प्रहरी कार्यालयले पीडितको उजुरी दर्ता नगरेपछि उच्च अदालत जनकपुर राजविराज इजलासमा ०८० असार ६ गते दिएको निवेदन अनुसार ०८० माघ ११ गतेको परमादेश जारी भएको थियो । परमादेशपश्चात पीडितले फागुन १० गते जिल्ला प्रहरी कार्यालयमा निवेदन दिएकोमा ०८० फागुन २३ गते सनाखत भई उजुरी दर्ता भएको थियो । आरोपितहरूले जग्गा जमिनको विषयमा वादविवाद भएको तर बोक्सी भन्दै कुटपिट नगरेको बताएका छन् ।


मनोहरकुमार पोखरेल