समाचारहरू

वोरिया गाविस-८ की ३८ वर्षीया वेचनीदेवी यादवलाई कथित बोक्सीको आरोपमा कुटपिट र दुर्व्यवहार गरेको कसुरमा सोही ठाउँ बस्ने काकाससुरा ५२ वर्षीय शिवु भनिने शिवनारायण यादवलाई पुनरावेदन अदालतले साउन २७ गते १५ दिन कैद र एक हजार जरिबानाको फैसला गरेको छ ।

पुनरावेदन अदालत राजविराजका मुख्य न्यायाधीश कुमार चुँडाल र न्यायाधीश उमेश सिंहको संयुक्त इजलासले सो फैसला गरेको अदालतले जनाएको छ । अन्य आरोपितहरू शिवनारायणकी पत्नी ४७ वर्षीया चननवती देवी यादव, निजकी छोरी २२ वर्षीया रेणुकुमारी यादव, ४४ वर्षीय रामकुमार यादव र निजकी पत्नी ३७ वर्षीया तपेश्वरीदेवी यादवलाई भने अदालतले सफाई दिएको छ ।

क्यान्सर रोगका कारण पाँच वर्षअघि मृत्यु भएका आफ्ना पतिको मृत्युको दोष लगाउनेदेखि रुख सुकेको र भैंसी बिरामी भएकोमा समेत टुनामुना गरेको भन्दै ०७१ वैशाख ११ गते र ०७१ असोज १ गते आरोपितहरूले कुटपिट र दुर्व्यवहार गरेको भन्दै पीडितले जिल्ला प्रहरी कार्यालयमा ०७१ वैशाख १५ गते र जिल्ला प्रशासन कार्यालयमा ०७१ असोज ७ गते उजुरी दिएकी थिइन् ।

आरोपितले भने जग्गासम्बन्धी विवादका कारण दुख दिने उद्देश्यले बेचनीदेवीले झुठो आरोप लगाएर आफूविरुद्ध उजुरी दिएको बताए ।

मनोहरकुमार पोखरेल