समाचारहरू

शम्भुनाथ नपा-१० रामपुर जमुवाकी ५२ वर्षीया सुकुन्तीदेवी साहलाई कथित बोक्सीको आरोपमा प्रहरीले अमानवीय व्यवहार गरेको घटनाका आरोपित सोही ठाउँका ३० वर्षीय कमल सदालाई माघ ३ गते गिरफ्तार गरेको इलाका प्रहरी कार्यालय कल्याणपुरले जनाएको छ ।

शम्भुनाथ नपा-१० रामपुर जमुवाका बुधन सदाको पाँच वर्षीया छोरीको पखालाका कारण ०७१ कात्तिक १४ गते मृत्यु भएकोमा टुनामुना गरी पीडितले मारेको भन्दै आरोपितहरूले सोही दिन कुटपिट गर्दै माटोको भाँडामा आगोको भुङ्ग्रो राखी सकुन्तीको मुखमा तीन पटक झोसेका थिए । पीडितको राजविराजस्थित गजेन्द्रनारायण सिंह सगरमाथा अञ्चल अस्पतालमा उपचार गरिएको थियो ।

घटनामा संलग्न धामी भारत विहार मधुवनीको खुटौनास्थित जोखी पिपराहीकी ४० वर्षीया रञ्जना सदा, रञ्जनाका भिनाजु शम्भुनाथ नपा-१० रामपुर जमुवाका ५० वर्षीय कृष्णदेव सदा, उनकी ४५ वर्षीया पत्नी रेणु सदा र ३० वर्षीय छिमेकी देवनारायण सदालाई प्रहरीले ०७१ कात्तिक १५ गते गिरफ्तार गरेको थियो ।

जिल्ला न्यायाधीश कमलप्रसाद पोखरेलको इजलासले ०७१ मङ्सिर ९ गते धामी रञ्जनालाई थुनामा तथा कृष्णदेव, रेणु र देवनारायणसँग जनही १७ हजार रुपियाँ धरौटी लिई तारेखमा रिहा गरेको थियो ।

न्यायाधीश पोखरेलकै इजलाशले ०७१ चैत २२ गते रञ्जनालाई सात महिना कैद र १० हजार रुपियाँ जरिबाना तथा कृष्णदेव, रेणु र देवनारायणलाई जनही चार महिना कैद र ७ हजार रुपियाँ जरिबानाको फैसला गरेको थियो । अदालतले फरार रहेका कमलका हकमा भने मुद्दा मुल्तवी राखेको थियो ।

मनोहरकुमार पोखरेल