समाचारहरू

तादी गाउँपालिका–१ बस्ने ५५ वर्षीया सन्चमाया तामाङलाई कथित बोक्सीको आरोप तथा आत्महत्या दुरुत्साहन कसुरमा तादी गाउँपालिका–१ उर्लेनीका ४८ वर्षीय लक्षु तामाङ र ५५ वर्षीय सम्बर तामाङलाई नुवाकोट जिल्ला अदालतले जनही दुई वर्ष दुई महिना कैद सजाय हुने फैसला गरेको छ ।

जिल्ला न्यायाधीश मदनबहादुर धामीको इजलासले ०७९ फागुन २८ गते गरेको अन्तिम फैसला अभियोगमा आंशिक दाबी पुग्ने ठहर गर्दै जनही दुई वर्ष दुई महिना कैद सजाय, २१ हजार पाँच सय रुपैयाँ जरिवाना, ५० हजार रुपैयाँ क्षतिपुर्ति र आठ सय ६० रुपैयाँ पीडित राहत कोषमा दाखिला गर्ने फैसला भएको नुवाकोट जिल्ला अदालतको सूचना अधिकारी तथा इजलास अधिकृत रीता लामिछानेले जानकारी दिनुभयो ।

लक्षु र सम्बरले सन्चमाया तामाङलाई बोक्सी आरोप लगाएर शारिरीक तथा मानसिक यातना दिएपछि ०७७ असोज १६ गते विष खाएर आत्महत्या गरेको भन्दै पीडित पक्षले जिल्ला प्रहरी कार्यालयमा असोज १८ गते उजुरी दिएको थियो ।

शवको पोष्टमार्टम सोही दिन त्रिशूली अस्पतालमा गरिएको थियो ।

जिल्ला अदालतले लक्षु र सम्बरलाई ०७७ कात्तिक १३ गते पुर्पक्षको लागि थुनामा राख्ने आदेश दिएको थियो ।

नवदीप श्रेष्ठ