कथित बोक्सीको आरोपमा कुटपिट गरेको घटनाका आरोपित गिरफ्तार

  ०७४ वैशाख ५ गते

कथित बोक्सीको आरोप लगाई धनगढीमाई नपा-६ की ५५ वर्षीया कुश्मादेवी यादवलाई कुटपिट गरेको आरोपमा प्रहरीले सोही ठाउँका ३८ वर्षीय शिवकुमार यादवलाई वैशाख ४ गते गिरफ्तार गरेको छ ।

पीडित महिलालाई आरोपितले चैत ३१ गते कथित बोक्सीको आरोप लगाई धारिलो हतियार प्रयोग गरी कुटपिट गरेको आरोपमा पीडित पक्षले इलाका प्रहरी कार्यालय लहानमा वैशाख ४ गते उजुरी दिएको थियो ।

कुटाइबाट घाइते भएकी पीडित महिलाको उपचार लहानस्थित लीलामदन पोलिक्लिनिक एण्ड प्रसूतिगृहमा भइरहेको छ ।

पीडित महिलाले 'टुनामुना' गरी आरोपितका छोरी किरणलाई पटक-पटक बिरामी पारेको आरोप लगाउँदै शिवकुमारसहित सोही ठाउँका ३४ वर्षीय विजयकुमार यादव, ३६ वर्षीय आशाराम दास, ३२ वर्षीया जिवछीदेवी यादव, ३० वर्षीय लिलादेवी दास र ४० वर्षीय जयलाल दासलगायतले कुटपिट गरेको आरोप लगाइन् ।

इलाका प्रहरी कार्यालय लहानका डिएसपी हिराबहादुर पाण्डेका अनुसार आरोपित शिवकुमार यादवलाई गिरफ्तार गरी अनुसन्धानका लागि 'म्याद' थप गराएको र अन्य आरोपित फरार रहेकोले खोजी कार्य भइरहेको जानकारी दिए ।


दुर्गा परियार