कथित बोक्सीको आरोपमा कुटपिट गरेको घटनाका आरोपित गिरफ्तार

 

सुर्यपुरा गाविस-७ की ५८ वर्षीया मालती केवटलाई कथित बोक्सीको आरोपमा कुटपिट गरेको भन्दै प्रहरीले सोही ठाउँका ५० वर्षीय रामनयन लोध र ३५ वर्षीय विनोद लोधलाई फागुन ३ गते गिरफ्तार गरेको छ ।

पीडित महिलालाई आरोपितद्वयले माघ २९ गते 'ए बोक्सी तैँले मेरो बुहारीलाई मर्नु न बाँच्नु गराइस' भन्दै कुटपिट गरेको पीडित पक्षको आरोप छ ।

आरोपितद्वयले आफ्नो आमालाई कुटपिट गरेपछि छुट्याउन जाँदा पीडितकी ३५ वर्षीया छोरी आरती केवटलाई समेत आरोपितले कुटपिट गरेको पीडित पक्षको आरोप छ ।

कुटपिटका कारण मालती केवटको दाँया हातमा गहिरो चोट र शरीरमा निलडाम देखिएको छ भने छोरी आरतीको ओठ तथा शरीरका विभिन्न अङ्गमा चोट लागेको स्थानीय बिन्दु चौहानले बताइन् ।

घटना लगत्तै पीडितहरूले इलाका प्रहरी कार्यालय सुर्यपुरामा उजुरी दिएका थिए । प्रहरीले आरोपितद्वयलाई गिरफ्तार गरी एक घण्टा पछि छाडेको थियो । प्रहरीले आरोपितलाई गिरफ्तार गरे पनि पीडितद्वयको घाउ जाँच र घटनासम्बन्धी अनुसन्धान नै नगरेको पीडितको आरोप छ ।

इलाका प्रहरी कार्यालय सुर्यपुराले वास्ता नगरेपछि पीडितहरूले स्थानीय सञ्चारकर्मीलाई गुहारेका थिए । सञ्चारकर्मीको सहयोगमा जिल्ला प्रहरी कार्यालय रुपन्देहीमा ०७३ फागुन ४ उजुरी दर्ता गरिएको जिल्ला प्रहरी कार्यालय रुपन्देहीका डिएसपी बेलबहादुर पाण्डेले बताए ।

पीडितद्वयको फागुन ४ गते नै भिम अस्पताल भैरहवामा उपचार गरिएको डिएसपी पाण्डेले बताए ।


रीमा बि.सी.