समाचारहरू

हिउँदसँगै जाडोको मात्रा बढिरहेको छ । संविधानले मौलिक हककै रूपमा व्यवस्था गरेको शिक्षाको हक उपभोग गरिरहेका चखेलका विद्यार्थीहरू भने जाडोको परवाह नगरी जस्ताले बारबेर पारेको टहारामा पढ्न बाध्य छन् ।

०७२ सालमा भूकम्पका कारण विद्यालय भवन क्षतिग्रस्त भएपछि जस्ताको छानोबाट कोठाभित्रै शीत चुहिने जाडो महिना होस् या हपहप हुने गर्मी महिना होस्, उत्तरी मकवानपुरको इन्द्रसरोबर गाउँपालिका–५, चखेलस्थित कालीदेवी माविका विद्यार्थीहरू यसरी नै पढ्दै आएका छन् ।

निर्माण कम्पनीले विद्यालय पुणर्निर्माण सम्पन्न गर्न सम्झौतामा तोकिएभन्दा ढिला गर्दा यस वर्षको हिउँदमा पनि विद्यार्थीहरू थुरथुर काम्दै जस्ताको टहरामा पढ्न बाध्य भएका हुन् ।

जापान अन्तरराष्ट्रिय सहयोग नियोग–जाइकाको ऋण सहयोगमा शिक्षा मन्त्रालयको केन्द्रीय आयोजना कार्यान्वयन एकाइले २०७४ सालदेखि निर्माण सुरू गरेको भवन अहिले अन्तिम चरणमा पुगेको छ ।

विद्यार्थीहरू भने यही चिटिक्क परेको ठूलो भवन हेर्छन् र जस्ताको छानामुनि बसेर पढ्छन् । ‘विद्यालय भवन त बनेको छ । तर, हामी टहरामै बसेर पढ्न बाध्य छौँ ।’–कक्षा ८ की सुमित्रा बलामीले भन्नुभयो-‘दिनदिनै जाडो बढिरहेको छ । चिसोले हात कठ्याङ्ग्रिएर लेख्न समेत अप्ठ्यारो हुन्छ ।’

गौरी पार्वती निर्माण सेवा प्रालिले ०७४ माघ १४ गतेबाट निर्माण सुरू गरेर ०७६ वैशाखमा सम्पन्न गर्ने गरी विद्यालय पुनर्निर्माणको जिम्मा लिएको थियो ।

अहिले भवन निर्माण भए पनि विद्यालय व्यवस्थापन समितिलाई भवन हस्तान्तरण भएपछि मात्रै पठनपाठन सुरू गरिने विद्यालयका प्रधानाध्यापक मधुकर कार्कीले बताउनुभयो ।

जाइकाले केन्द्रीय आयोजना कार्यान्वयन एकाईमार्फत् मकवानपुरमा ४१ ओटा विद्यालयको भवन निर्माण गरिरहेको छ ।

मकवानपुरमा हालसम्म सरकारी र गैरसरकारी संस्थाको सहयोग गरेर २ सय ५५ ओटा विद्यालय निर्माण भएका छन् ।

५ सय १६ विद्यालय रहेको मकवानपुरमा ०७२ सालको भूकम्पबाट ४ सय ९ ओटा विद्यालय भौतिक रूपमा प्रभावित भएका थिए ।

पुष्पराज अधिकारी