समाचारहरू

सिमकोट गाउँपालिका–५ स्थित बालमन्दिर माध्यमिक विद्यालयको कक्षा कोठामा पानीको भल पसेपछि पठनपाठनमा समस्या भएको छ । असार २० गतेदेखि नियमित रुपमा परेको अविरल वर्षाका कारण विद्यालयका चार ओटा कक्षा कोठामा भल पसेपछि पठनपाठनमा समस्या भएको हो ।

कक्षाकोठामा भलपसेपछि पठनपाठनमा समस्या भएको कक्षा ९ मा अध्ययनरत सुप्रभा भण्डारीले बताउनुभयो । उक्त विद्यालयका प्रधानाध्यापक कैलाश रोकायाले माटो र ढुङ्गाले बनेको कारण भवनको पछाडितिरको भागबाट पानीको भल कक्षा कोठामा पसेपछि एक साता देखि पठनपाठनमा समस्या भएको बताउनुभयो ।

करिब एक साता देखि सो विद्यालयको चार ओटा कक्षाका विद्यार्थीको पठनपाठनमा बन्द भएको छ । विद्यालयमा अरु विकल्प नहुँदा विद्यार्थीहरु विद्यालयमा आएर पढ्नबाट हुनु परेको प्रधानाध्यापक रोकायाले बताउनुभयो ।

सामान्य रुपमा मौसम सफा भएसँगै विद्यार्थीहरू र शिक्षक मिलेर कोठामा जमेको पानी फाल्ने कार्य भएको उहाँले बताउनुभयो । यो समस्या वर्षेनी भोग्नु परिरहेका कारण नयाँ भवन निर्माण गर्नुपर्ने वा कक्षाको भुइँ ढलान लागि धेरै निकायसँग अनुरोध गर्दा पनि हालसम्म सहयोगी निकाय नपाएको उहाँले गुनासो गर्नु भयो ।

विद्यालयमा ८० जना विद्यार्थी पठनपाठन वञ्चित भएका छन् । विद्यालयका शिक्षक कल्पना रावतले बर्खा लाग्ने बित्तिक्कै यो समस्या बारम्बार भोग्नु परिरहेको बताउनुभयो । कक्षामा पानीको ठुलो भल पसेपछि पठनपाठनमा बन्द गरेर विद्यार्थीहरुलाई घर पठाउनुपर्ने अवस्था विगतदेखि रहँदै आएको छ ।

नन्द सिंह