समाचारहरू

विद्यालयको भौतिक संरचना नहुँदा बागलुङको पश्चिम ढोरपाटनमा रहेको जनवादी आधारभुत विद्यालयका बालबालिका खुल्ला आकाशमुनी पढ्न बाध्य भएका छन् । कक्षा १ देखि ८ सम्म पढाइ हुने  यस विद्यालयमा ४ सय बालबालिका अध्ययनरत छन् ।

यति धेरै सङ्ख्यामा विद्यार्थी रहेको विद्यालयमा पाँच ओटामात्र जीर्ण कोठा छन् । विद्यालयमा भौतिक संरचना कम भएको र भएको संरचना पनि जीर्ण भएकै कारण यहाँका विद्यार्थीहरू खुल्ला चौरमा पढ्न बाध्य भएका हुन् ।

ढोरपाटन नपा-७ नबीमा रहेको यस विद्यालय घुम्ती विद्यालय हो । यहाँ गर्मीयाममा पढाइ हुन्छ भने हिउँदमा यो विद्यालय बोबाङमा र्सछ । ढोरपाटनमा रहेको यस विद्यालयमा फागुनदेखि कात्तिकसम्म पढाइ हुन्छ ।

जाडो मौसममा भने हिउँ पर्ने भएकाले अभिभावक सपरिवार वस्तुभाउ लिएर वेशी र्झछन्  । उनीहरूसँगै बालबालिका पनि झरेपछि ढोरपाटनको विद्यालय बन्द हुन्छ र बोबाङमा रहेको तल्लो विद्यालय सञ्चालनमा आउँछ  ।

बोबाङमा रहेको विद्यालयको भौतिक संरचना पनि जीर्ण र अपुग छ । जाडोमा अत्याधिक जाडो र गर्मी मौसममा पनि ३ हजार मिटरभन्दा माथिल्लो उचाईमा भएका कारणले यस क्षेत्रमा दैनिक पानी परिरहन्छ । पानी परेको समयमा सबै विद्यार्थीलाई एउटै कोठाभित्र राख्नुपर्ने बाध्यता रहेको शिक्षाको भनाइ रहेको छ ।

विद्यालयका कोठाहरूमा नअटाएका विद्यार्थीहरू पानी परेपछि घर जाने गरेको विद्यालयका प्रधानाध्यापक देवबहादुर सुनारले बताए । सुनारका अनुसार विद्यार्थीहरू आफ्नो घरको काम नभ्याएसम्म विद्यालय आउँदैनन् । अविभावकमा छोराछोरीलाई पढाउनुपर्छ भन्ने चेतना नभएकै कारण यस क्षेत्रका विद्यार्थीहरू घर, गाईवस्तु हेर्ने काम सकेपछि मात्र पढ्न आउने गर्छन् ।

तीन जना शिक्षकको दरबन्दी रहेको यस विद्यालयमा ३ सय ८० जना दलित समुदायका बालबालिका छन् । अविभावकहरूबाट चन्दा सङ्कलन गरी विद्यालयले थप पाँचजना शिक्षक शिक्षिकाको व्यवस्था गरेको छ । दुर्गममा रहेको यस विद्यालयलाई सरोकारवालाहरूले सदरमुकामका सम्पन्न विद्यालयहरूसरह व्यवाहार गरेको प्रअ सुनारको गुनासो छ

सिर्जना पन्त