समाचारहरू

जिल्ला जनस्वास्थ्य कार्यालय ओखलढुङ्गामा आवश्यक औषधि खरिद गर्न रकम अभाव भएको जनाएको छ ।

रकम अभाव भएपछि स्वास्थ्य संस्थामा २५ किसिमका औषधि अभाव भएको पनि कार्यालयले जनाएको छ ।  जिल्लामा वार्षिक १ करोड १५ लाख रुपियाँको औषधि आवश्यक पर्ने भए पनि ४५ लाख रुपियाँ मात्रै औषधि खरिदका लागि निकासा भएको जिल्ला जनस्वास्थ्य कार्यालयका प्रमुख प्रमोद यादवले बताए । रकम अभावले माग अनुसार औषधि खरिद गर्न नसकिएको उनले जानकारी दिए ।

हरेक वर्ष निःशुल्क रूपमा वितरण गर्नुपर्ने औषधि खरिदका लागि केन्द्रबाट आउने रकम कम हुने गरेको छ । कार्यालयका अनुसार औषधि खरिदको प्रक्रिया समेत झन्झटिलो हुँदा औषधिको अभाव सिर्जना हुने गरेको छ ।

अहिले ४० प्रकारका औषधि खरिद गरी स्वास्थ्य संस्थामा वितरण भए पनि अन्य औषधि जिल्लामा नहुँदा बिरामीले निजी क्लिनिकबाट खरिद गर्नु पर्ने बाध्यता छ ।

गाउँका स्वास्थ्य संस्थामा औषधि नहुँदा नागरिकले पाउने निशुल्क औषधि खरिद गर्नु पर्ने बाध्यता रहेको रगनीका मेघराज घिमिरेले बताए । स्वास्थ्य चौकी, क्लिनिक, प्राथमिक स्वास्थ्य केन्द्र गरी जिल्लाभर ५६ वटा सरकारी स्वास्थ्य संस्था रहेका छन् ।

 

शिवप्रसाद ढुङ्गाना