समाचारहरू

रोल्पा जिल्ला अस्पताललगायत जिल्लाका विभिन्न स्वास्थ्य संस्थामा औषधिको अभाव भएको छ । सरकारले निःशुल्क दिने भनिएका औषधि पनि स्वास्थ्य संस्थामा छैनन् ।

केही दिन यता जिल्ला अस्पताललगायत प्रायः सबै स्वास्थ्य संस्थामा ज्वरोका बिरामीको चाप छ । तर, जिल्ला अस्पतालमा नै ज्वरो आएका बिरामीलाई खुवाइने सिटामोलसमेत छैन । बिरामी हुनेमा बालबालिकाको सङ्ख्या धेरै छ । तर, उनीहरूलाई आवश्यक पर्ने झोल औषधिमा सिटामोल नहुँदा थप समस्या परेको जिल्ला स्वास्थ्य कार्यालय रोल्पाका सिनियर अहेब कुलबहादुर डाँगीले बताए ।

अस्पतालको स्टोरका कर्मचारीलाई जानकारी गराएको भएता पनि प्रशासनको लापरबाहीका कारण स्टोरमा पनि धेरै औषधि सकिन थालेको आरोप छ । झोलका सिटामोल पनि नभएको जिल्ला स्वास्थ्य कार्यालयका स्टोरकिपर मनिराम बुढाले जानकारी दिए ।

तर, औषधि सप्लाईको सबै जिम्मा नगरपालिका र गाउँपालिकाको भन्दै अस्पतालको समस्या पनि उनैले हेर्नुपर्ने जिल्ला स्वास्थ्य कार्यालयका प्रमुख डा. भवानीप्रसाद शर्माको भनाई छ ।

जिल्ला अस्पताल रोल्पासँगै थबाङ, लुङ्ग्री, सुकिदह, सुनछहरी, सुवर्णावतीलगायत गाउँपालिकाका स्वास्थ्य संस्थामा पनि औषधि अभाव हुँदा वर्षायाममा हुनसक्ने सम्भावित महामारीबाट रोल्पाली जनता जोखिममा रहेका छन् ।

माधवकुमार ओली