समाचारहरू

हेटौँडा उपमहानगरपालिका–३ की २६ वर्षीया विन्दवासिनी कंसाकारलाई एसिड प्रहार गरेको आरोपमा प्रहरीले भारत महाराजगञ्ज अमरपुर्वन–६ का ३२ वर्षीय राज भनिने दिलिपराज केशरीलाई कात्तिक १४ गते गिरफ्तार गरेको छ ।

पीडित महिलालाई विवाह प्रस्ताव अस्वीकार गरेको भन्दै आरोपितले ०७० वैशाख ९ गते  एसिड प्रहार गरेका थिए ।

आरोपितलाई प्रहरीले साढे ६ वर्ष पछि बाराको भलोहीबाट गिरफ्तार गरेको र यसभन्दा पहिला आरोपित भरतमा लुक्दै बसेको जिल्ला प्रहरी कार्यालय बाराका एसपी विकासराज खनालले बताए ।

पीडित महिलामाथि एसिड प्रहार गरी घाइते बनाएर फरार रहेको भन्दै पीडित पक्षले आरोपित विरूद्ध ०७० वैशाख ९ गते नै जिल्ला प्रहरी कार्यालय मकवानपुरमा उजुरी दिएको थियो ।

उक्त उजुरीका आधारमा फरार आरोपितको खोजी भइरहेको अवस्थामा बारा प्रहरीले आरोपितलाई गिरफ्तार गरी काक्तिक १५ गते जिल्ला प्रहरी कार्यालय मकवानपुरलाई बुझाइ अरोपितलाइ कात्तिक १५ गते नै पत्रकार सम्मेलन गरी सर्वजनिक गरिएको उक्त कार्यालयका डिएसपी यज्ञप्रसाद भट्टराईले बताए ।

आरोपितलाई मुलुकी ऐन ज्यानसम्बन्धी महलको १५ नम्बर अनुसार ५ वर्षदेखि १२ वर्षसम्म  कैद सजाय हुने कानुनी प्रावधान रहेको पनि डिएसपी भट्टराइले बताए ।

पत्रकार सम्मेलनमा पीडीत महिलाले ढिलै भएपनि प्रहरीले आरोपितलाई गिरफ्तार गरी कानुनको दायरामा ल्याएकाले आफूले न्यायको अनुभूति गरेको बताइन् ।

एसिड प्रहारका कारण अनुहार जलेकी पीडितको नेपालबाहेक भारतमा गएर समेत उपचार गरिएको र अझैपनि उपचारकै क्रममा रहेको पीडितले बताइन् ।

पुष्पराज अधिकारी