समाचारहरू

हेटौँडा उपमहानगरपालिका–३ की २६ वर्षीया विन्दावासिनी कंसाकारलाई एसिड प्रहार भएको घटनाका आरोपित हेटौँडा उमनपा–२ का २८ वर्षीय सञ्जय मण्डललाई प्रहरीले कात्तिक २३ गते गिरफ्तार गरेको छ ।

पीडित महिलालाई विवाह प्रस्ताव अस्वीकार गरेको भन्दै कंसाकारलाई एसिड प्रहार गर्ने मुख्य आरोपित दिलिपराज केशरीलाई सहयोग गरेको अभियोग (मतियार)मा प्रहरीले मण्डललाई हेटौँडा उमनपा–४ फरेष्ट्रिबाट गिरफ्तार गरेको जिल्ला प्रहरी कार्यालयका एसपी मुकेशकुमार सिंहले बताए ।

आरोपित मण्डलले एसिड प्रहार गर्ने केशरीलाई मोटरसाइकलमा राखेर भगाएको आरोप छ । मण्डललाई थप अनुसन्धानका लागि जिल्ला अदालत मकवानपुरबाट सात दिनको म्याद थप गरी हिरासतमा राखिएको प्रहरीले जनाएको छ ।

यसअघि एसिड प्रहार घटनाका मुख्य आरोपित भारत महाराजगञ्ज अमरपुर्वन–६ का ३२ वर्षीय राज भनिने दिलिपराज केशरीलाई कात्तिक १४ गते गिरफ्तार गरेको थियो ।

पुष्पराज अधिकारी