समाचारहरू

पञ्चपुरी नपा-३ की १८ वर्षीया गौरीकला रोकायको हत्यामा संलग्न रहेको आरोपमा इलाका प्रहरी कार्यालय बाबियाचौरमा कार्यरत ट्राफिक प्रहरी ३२ वर्षीय हरि कोइराला र पञ्चपुरी नपा-५ का स्थानीयबासी ३० वर्षीय लक्ष्मी बास्तोलालाई प्रहरीले चैत १३ गते गिरफ्तार गरेको छ ।

पञ्चपुरी नपा-३ बाबियाचौरस्थित डेरामा चैत १३ गते बिहान गौरीकला मृत अवस्थामा भेटिएकी थिइन् । गौरी सूर्यप्रकाश मावि पलैंटेकी एसर्इई परीक्षार्थी हुन् । उनको टाउकोको बाँया भागमा र गोडामा चोट लागेको छ । अबेरसम्म ढोका नखुलेपछि छिमेकीले प्रहरीलाई खबर गरेपछि उनी बसेको ढोका खोल्दा उनी मृत अवस्थामा फेला परेको प्रहरीले जनाएको छ ।

प्रहरीको प्रारम्भिक अनुसन्धानले हत्या हुन सक्ने अनुमान गरेको थियो । 'खाटमा पल्टिएको अवस्थामा मृत्यु भएको रहेछ । टाउकोमा चोटपटक पनि थियो ।'-जिल्ला प्रहरी कार्यालयका एसपी उमाप्रसाद चर्तुवेदीले भने-'बाहिर कुटपिट गरेर घाइते वा मृत अवस्थामा डेरामा लिएर छाडिएको हुनुपर्छ ।' एसपी चर्तुवेदीले घटनालाई प्रहरीले गम्भीरताका साथ अनुसन्धान गरिरहेको बताए । पोष्टमार्टमपछि अनुसन्धानमा सहज हुने उनले बताए । शवको पोष्टमार्टम चैत १४ गते गर्ने तयारी भएको प्रहरीले जनाएको छ ।

आरोपितले गौरीकलालाई चैत १२ गते राति ९ बजे कोठाबाट बाहिर लगेको र सोही दिन राति १/२ बजे कोठामा पुर्‍याई छाडेको जनाइएको छ । मृतकका परिवारले हत्या भएको भन्दै प्रभावकारी अनुसन्धान गरी कारबाही अघि बढाउन अनुरोध गरेका छन् ।

दुर्गा थापा