समाचारहरू

मर्मतका लागि आर्थिक अभाव भएपछि पर्वतको फलेवास नपा-११ पाङराङ स्वास्थ्य चौकीमा प्रदान गरिएको एम्बुलेन्स ६ महिनादेखि स्वास्थ्य चौकी परिसरमै थन्किएको छ । एम्बुलेन्सले सेवा प्रदान नगरेपछि करिब डेढ वर्षअघि गाउँमा एम्बुलेन्स भित्रिँदा हर्षित पाङराङलगायत सो क्षेत्रका सर्वसाधारण अहिले निरास छन् ।

ग्रामीण क्षेत्रको कच्ची सडकमा करिब १ वर्षसम्म आकस्मिक बिरामीलाई जिल्ला अस्पतालदेखि पोखरालगायतका अन्य स्वास्थ्य संस्थामा पुर्‍याउँदै आएको एम्बुलेन्स अहिले स्वास्थ्य चौकीमा नै थलिएको छ ।

सो एम्बुलेन्स तत्कालीन सभासद् विकास लम्सालले संसद विकास कोषको रकमबाट स्वास्थ चौकीलाई प्रदान गरेका थिए । गाउँमा रहेको एम्बुलेन्सबाट सेवा नपाएपछि पाङराङ र आसपास वडाका बिरामीले दिउँसोको समयमा सार्वजनिक सवारीसाधन र रातमा बिरामी बोकेर करिब पाँच घण्टा लामो बाटो पैदलै सदरमुकाम कुश्मासम्म पुग्नु पर्ने बाध्यता भोग्दै आएका छन् ।

सो वडाका वडाध्यक्ष शेरबहादुर सुनारले एम्बुलेन्स मर्मतका लागि नगरपालिकाबाट बजेट विनियोजन नभएकाले मर्मत गर्न नसकिएको प्रतिक्रिया दिए ।

मर्मतका लागि नगरपालिकामा माग गरिएको र नगरपालिकाले बजेटको साटो आश्वासन मात्रै दिएको उनको आरोप छ । तर, पछिल्लो समयमा एम्बुलेन्सको स्वामित्व एम्बुलेन्स सञ्चालक समिति वा वडा कार्यालयले लिने भन्नेमा समेत विवाद भएकाले एम्बुलेन्स अलपत्र परेको स्थानीयको भनाइ छ ।

सन्तोष थापा