समाचारहरू

रुन्टीगढी गाउँपालिका-८ झेनाम मेलटाकुरामा असार १० गते बिहान ५ बजे नेकपा एमाले र माओवादी केन्द्रका कार्यकर्ताबिच भएको झडपमा ११ जना घाइते भएका छन् ।

झडपमा परी नेकपा एमालेका रुन्टीगढी गाउँपालिका-८ का वडा सदस्यका उम्मेदवारहरू कृष्णबहादुर बुढा, इन्द्रकुमारी पुन घाइते भएको प्रहरीले जनाएको छ । त्यसैगरी एमाले कार्यकर्ताहरू शान्तराज बुढा, धनकुमार बुढा, दिपक बुढा र हरीप्रसाद बुढा घाइते भएका छन् । नेकपा माओवादी केन्द्रका कार्यकर्ताहरू कुमार पुन, प्रेम बुढा, कमल बुढा घाइते भएको जिल्ला प्रहरी कार्यालय रोल्पाका डिएसपी रामप्रसाद र्घर्तीले बताए ।

एमालेका कार्यकर्ताहरू चुनाव प्रचारप्रसार गरी असार ९ गते राति स्थानीय रुद्रबहादुर बुढाको घरमा बास बसेका थिए । असार १० गते बिहान छिमेकी कृष्णबहादुर बुढाले एमालेको टोलीले आफ्नो बारीमा 'कुखुराको आन्द्रा' फालेको आरोप लगाएपछि विवाद उत्पन्न भएको प्रहरीले जनाएको छ ।

यस्तै कृष्ण बहादुरको घरमा आएकी विवाहित छोरी मनरुपा कवँर र कृष्णका छोरा भरत बुढासमेत घाइते भएको प्रहरीले जनाएको छ । घाइतेहरूको होलेरी प्राथमिक स्वास्थ्य केन्द्रमा उपचार भइरहेको छ ।

रुन्टीगढी गाउँपालिका निर्वाचन कार्यालयले उक्त गाउँपालिकाका कार्यकारी अधिकृत शर्मिला न्यौपानेको नेतृत्वमा गठन गरेको निर्वाचन समन्वय समितिले असार १० गते दुवै पक्षलाई आगामी दिनमा यस्ता गतिविधि नगर्ने सहमति गराएको छ ।

माधवकुमार ओली