समाचारहरू

नेकपा एमालले निर्वाचन प्रचारप्रसार गरिरहेको अवस्थामा अपिहिमाल गाउँपालिका–५ ओखलमा एमाले कार्यकर्ता र लोकतान्त्रीक गठबन्धनका कार्यकर्ताबिच कात्तिक २४ गते साँझ झडप भएको छ ।

झडपका क्रममा मार्मा गाउँपलिका–३ निवासी एमाले कार्यकर्ता २८ वर्षीय विरेन्द्र विष्ट र शैल्यशिखर नगरपालिका–९ का २५ वर्षीय सुरेश वादी, अपिहिमाल गाउँपालिका–६ निवासी गठबन्धनका कार्यकर्ता २० वर्षीय जहेन्द्रसिह धामी र २४ वर्षीय जगतसिह धामी घाइते भएका जिल्ला प्रहरी कार्यालयका इन्स्पेक्टर राजेश शाहीले बताउनु भयो ।

घाइतेहरुको टाउँकोमा चोट लागेका कारण समान्य उपचारपछि चारै जनालाई थप उपचारको लागि रिफर गरिएको मार्मा स्वास्थ्य चौकीका डाक्टर लक्ष्मण थापाले बताउनु भयो ।

टाउँकोमा चोट लागेका कारण वाहिर समान्य देखिएको भएपनि टाउँको भित्र चोट हुन सक्ने भएकोले सिटिस्क्यान गर्नु पर्ने भएकोले स्वास्थ्य चौकीबाट रिफर गरिएको डाक्टर थापाको भनाइ छ ।

झडपपछि इलाक प्रहरी कार्यालय, लटिनाथबाट इन्स्पेक्टर लोकेन्द्रबहादुर सिंह नेतृत्वको टोलीले उम्मेदवारको टोलीलाई सुरक्षित स्थानमा पठाइएको र कात्तिक २५ गते दुबै पक्षलाई छलफलको लागि इलाका प्रहरी कार्यालयमा बोलाइएको जिल्ला प्रहरी कार्यालयका इन्स्पेक्टर शाहीले बताउनु भयो ।

नेकपा एमालेबाट प्रदेशसभा (ख) का उम्मेदवार रहनु भएका रामदत्त जोशीले अपिहिमाल गाउँपालिकाबाट घरदैलो गरेर मार्मा फर्किने क्रममा मदक पदार्थ सेवन गरेका गठबन्धनका कार्यकर्ताले प्रचारप्रसारमा अवरोध गरी सुनियोजि रुपमा आफूमाथि आक्रमण गर्दा झडप भएको आरोप लगाउनु भयो ।

माओवादी केन्द्र मार्माका अध्यक्ष नरबहादुर विष्टले एमाले कार्यकर्ताले सुनियोजित रुपमा आक्रमण गर्दा झडप भएको आरोप लगाउनु भयो ।

नरेन्द्रसिह कार्की