समाचारहरू

संयुक्त लोकतान्त्रिक मधेसी मोर्चाले सप्तकोशी गाउँपालिका-५ कमलपुरस्थित नेकपा (एमाले) स्थायी कमिटी सदस्य एवम् प्रदेश नं. २ का संयोजक सत्यनारायण मण्डलको घरमा चैत २७ गते कालो झण्डा झुण्ड्याएका छन् ।

मोर्चाका जिल्ला संयोजक दिनेशकुमार यादवको नेतृत्वमा मोटरसाइकल र्‍यालीसहित पुगेका मोर्चाका कार्यकर्ताहरूले पूर्व खेलकुद मन्त्री मण्डलको घरमा कालो झण्डा झुण्ड्याउनुका साथै घरमा रहेका उनका ६० वर्षीया पत्नी र २१ वर्षीया बुहारीलाई गाली गलौजसमेत गरेको पीडित परिवारले जनायो ।

एमाले नेता मण्डलले मोर्चाका कार्यकर्ताहरूले घरमा महिलाहरूलाई गालीगलौज गरेर अपमानित गरेर सामाजिक मर्यादाको समेत उल्लङ्घन गरेको बताए ।

मोर्चाका कार्याकर्ताहरूले यसअघि कञ्चनरुप नगरपालिका र सप्तकोशी गाउँपालिकाको समेत बोर्ड हटाएर कालो झण्डा झुण्ड्याउनुका साथै स्थानीय निकायमा तालाबन्दी गरी कर्मचारीहरूलाई कामकाज नगर्न समेत धम्की दिएका छन् ।

यसैबिच नेता मण्डलको परिवारका सदस्यहरूमाथि गरेको दुर्व्यवहारप्रति एमालेले चैत २८ गते एक विज्ञप्ति जारी गर्दै घोर भत्सर्ना गरेको छ ।

नेकपा (एमाले) स्थायी समितिको चैत २८ गते बसेको वैठकले मधेसी मोर्चाका 'उदण्ड झुण्ड'द्वारा मण्डलको सप्तकोशी गाउँपालिका-५ स्थित घरमा पसेर परिवारका महिला सदस्यहरूमाथि हुलहुज्जत गर्नेजस्ता आपत्तिजनक तथा निन्दनीय कार्य गरेकोप्रति घोर भत्सर्ना गरेको हो ।

एमाले प्रचार विभाग प्रमुख योगेश भट्टराईले चैत २८ गते विज्ञप्ति जारी गरी सप्तरी जिल्ला कमिटीका अध्यक्ष गोविन्द न्यौपानेको घरमा समेत त्यस्तै खालका क्रियाकलापहरू गरेको भन्दै संलग्न अपराधिहरूमाथि तत्काल कारबाही गर्न नेपाल सरकारको गम्भीर ध्यानाकर्षण गराएका छन् ।

एमाले जिल्ला कमिटीका अध्यक्ष गोबिन्द न्यौपानेले ४०/५० जनाको समूहमा मोटरसाइकल चढेर पुगेका मधेसी मोर्चाका कार्यकर्ताले मण्डलको घरमा पसेर उनकी २१ वर्षीया बुहारी अस्मिता मण्डललगायतका परिवारका सदस्यलाई गालिगलौज गर्दै दुर्व्यवहार गरेको बताए । मोर्चाको उक्त अपराधिक कार्यप्रति खेद व्यक्त गरी यस्ता घटना नदोहोर्‍याउन चेतावनी दिँदै अध्यक्ष न्यौपानेले विज्ञप्तिमार्फत दोषीलाई कारबाही गर्न स्थानीय प्रशासनसँग जोडदार माग गरेका छन् ।

कञ्चनरुप नगरपालिका र सप्तकोशी नगरपालिका कार्यालयको बोर्ड हटाई कालो झण्डा झुण्ड्याएर फर्केको मोर्चाका कार्यकर्ताहरूले मण्डलको घरमा गालीगलौज गर्दै चैत २७ गते कालो झण्डा झुण्ड्याएका थिए ।

मनोहरकुमार पोखरेल