समाचारहरू

काम गरेबापतको पारिश्रमिक नपाएपछि पत्रकारहरूले ०७९ असार ६ गतेदेखि चरणबद्द आन्दोलनकोे सुरुवात गरेका छन् । आठवीसकोट नगरपालिकामा संचालित रेडियो नयाँ नेपाल ९८.२ मेगाहर्जले पारिश्रमिक नदिएको भन्दै पत्रकारहरू आन्दोलित भएका हुन् ।

दुई वर्ष यता रेडियोमा काम गर्दै आइरहेका ६ जना पत्रकारले पारिश्रमिक नपाएको बताइएको छ । पारिश्रमिक नपाउने पत्रकारहरू हिरा परियार, सत्यबहादुर बटाला, सुनिल बिक, प्रकाश गौतम, कल्पना बिक र सीता शाही रहेका छन् । रेडियो संचालक समितिले काम लगाएको र काम गरेबापतको पारिश्रमिक माग्दा आफूहरूलाई व्यवास्ता गरेको कुनै पनि चासो नदेखाएको पत्रकार हिरा परियारले जानकारी दिनुभयो । आफूहरूले काम गरेबापतको ६ जनाको पारिश्रमिक रेडियोले दश लाख रुपियाँ भुक्तानी गर्न बाँकी रहेको उहाँको भनाई छ ।

पारिश्रमिक मागगर्दै आएका पत्रकारहरूले चार बुँदे माग राखेर आन्दोलन गरिराखेका छन् । अविलम्ब पारिश्रमिक दिनुपर्ने, श्रमजीवि पत्रकारिता ऐन अनुसार पारिश्रमिक व्यवस्था गरिनुपर्ने, परिक्षणकाल पुरा गरेका कर्मचारीलाई स्थाई गरिनुपर्ने र हक अधिकारको विषयमा बोलेकै भरमा निष्कासन गर्ने, जगेडामा राख्ने, अनावश्यक तनाव दिने, राजीनामा दिन बाध्य पार्ने जस्ता कार्य रेडियोले तत्काल बन्द गर्नुपर्ने जस्ता माग राखिएको छ । पत्रकारहरूले पटक पटक आफ्नो काम गरेबापतको पारिश्रमिक माग गर्दा पनि सुनुवाई नभएपछि आन्दोलन गर्नुपरेको पत्रकार सत्यबहादुर बटालाको भनाई छ । पारिश्रमिक उपलब्ध गराउन रेडियो संचालक समितलाई आग्रह गरेको र रेडियो संचालक समितिले वास्ता नगरेको पत्रकारहरूको आरोप रहेको छ ।

पत्रकारहरूले पारिश्रमिक नपाएको बिषयमा नेपाल पत्रकार महासङ्घ रुकुम शाखाले ०७९ असार ८ गते एक विज्ञप्ति सार्वजनिक गर्दै आपत्ति जनाएको छ । पारिश्रमिक नपाएका पत्रकारहरूको पारिश्रमिक अबिलम्ब उपलब्ध गराउन पत्रकार महासङ्घले आग्रह गरेको हो । त्यसैगरी पत्रकारहरूले पारिश्रमिक नपाएको बिषयमा पत्रकारहरूका सङ्घ सङ्गठनले आपत्ति जनाउदै पत्रकारले थालेको आन्दोलनमा एक्यवद्धता रहेको जानकारी दिएका छन् । ०७९ असार ९ गते विज्ञप्ति सार्वजनिक गर्दै विभिन्न सङ्गठनहरूले आपत्ति जनाएका हुन ।

मनिषा केसी