समाचारहरू

रोल्पा  जिल्लामा अझैपनि १ हजार ८ सय ९३ जना बालबालिका विद्यालयको पहुँच भन्दा बाहिर रहेको जिल्ला शिक्षा कार्यालयले गरेको अध्ययनले देखाएको छ ।

जिल्लाको पश्चिम क्षेत्रमा रहेका गाविसका बालबालिका विद्यालयको पहुँच भन्दा बाहिर रहेको उक्त अध्ययनले देखाएको हो । जिल्ला शिक्षा कार्यालय, रोल्पाको तथ्याङ्क अनुसार विद्यालय बाहिर रहेका दलित बालबालिका अन्तर्गत छात्र २ सय ५७ जना र छात्रा ३ सय जना रहेका छन् । त्यसैगरी जनजाति बालबालिका अन्तर्गत छात्र ३ सय ९२ जना, छात्रा ४ सय ३६ जना र अन्य छात्र २ सय ४१ जना र छात्रा २ सय ६७ जना बालबालिका रहेका छन् ।

जिल्लामा कूल १ हजार ८ सय ९३ जना बालबालिका विद्यालय बाहिर रहेको जिल्ला शिक्षा कार्यालय, रोल्पाले जनाएको छ ।

जिल्लामा यति धेरै बालबालिका विद्यालय बाहिर रहनुमा गरिबी नै प्रमुख कारण रहेको जिल्ला शिक्षा अधिकारी चिरञ्जिवी पौडलले बताए । बसाइसराई, बालविवाह, अपाङ्गता, बाबुआमाको स्वास्थ्य, भाइबहिनीको हेरचाह, घरको व्यस्तता, पढ्न नचाहनुलगायतका कारणले पनि बालबालिका विद्यालयको पहुँच बाहिर रहेको पौडेलले बताए ।

माधवकुमार ओली