समाचारहरू

एक वर्ष अघि परेको अविरल वर्षाले डुवानमा परेर क्षति भएका तीन घरपरिवारले राहत नपाएको गुनासो गरेका छन् ।

गत वर्षको असोज र कात्तिक महिनामा परेको अविरल वर्षाका कारण सिमकोट गाउँपालिका–७ को डाँडाफयाका तीनओटा घरलाई पूर्ण रुपमा क्षति बनाएको थियो ।
वर्षाले क्षति बनाएको करिब एक वर्ष बित्दा पनि स्थानीयले राहतको महसुुस गर्न पाएका छैनन् ।

बाढी पहिरो गएर घर डुबानमा पर्यो नत कसैले राहत नै दिए नत सुनुवाई भयो स्थानीय पीडित मैकला शाहीले गुनासो गर्नु भएको छ ।

रातीको समयमा आएको बाढी पहिरोले गर्दा सोही गाउँपालिका ७ को माझगाउँका स्थानीय मैकला शाहीको दुई तले घर र कालिबहादुर विकको एक तले घरलाई पूर्ण क्षति पुर्याएको थियो । उक्त वर्षाले पुर्याएको क्षतिका लागि घर धनीहरूले जिल्लाका विभिन्न स्थानीय तह लगायत सरोकारवाला निकायमा राहतका लागि अनुरोध गर्दा पनि कसैले सहयोग नगरेको शाहीले गुनासो गर्नु भयो ।

पीडित शाहीका अनुसार चार वर्षअघि सोही ठाउँमा आफूले निर्माण गरेको घरलाई हिल्सा सिमकोट सडक योजनाले डोजर लगाई भत्कायो त्यस बेलापनि राहत पाइएन । पुनः पनि वर्षाले घर डुवानमा पर्यो जिल्ला विपत व्यवस्थापन समिति र सिमकोट गाउँपालिकाले पर्याप्त राहतको व्यवस्था नगरेको पीडितको आरोप छ ।

करिब एक वर्षदेखि घर डुवानमा परेको र घर अगाडीको बालि नाली समेत बगाएर लगेपछि दैनिक साँझ र बिहानको छाक टार्न समेत सकस भएको शाहीले गुनासो गर्नु भयो । उहाँले भन्नु भयो गाँस, बास र कपासका लागि पटक पटक सिमकोट गाउँपालिकालाई अनुरोध गर्दा पनि आश्वासन मात्रै दिने तर सहयोग गरेका छ्रनन्् ।

घर डुवानमा परे लगतै धारापोरी प्रहरी चौकीले मुचुल्का गरेको थियो । प्रहरीको मुचुल्काको आधारमा जिल्ला विपत व्यवस्थापन समितिले १० हजार रुपियाँ सहयोग गरेपनि त्यसले केही नपुग्ने पीडित शाहीले जानकारी दिनु भयो ।

विशेष गरेर सो ठाउँका तीन घरपरिवार उच्च जोखिममा रहेको र गाउँपालिकामा बस्ती विस्तारका लागि आफुले पटक पटक अनुरोध गर्दै आएको वडाध्यक्ष बलविर शाहीले बताउनु भयो । उक्त बस्तीमा मैकला शाहीको दुईतले घर र कालि बहादुर सुनारको एक तले घर उच्च जोखिममा रहेको वडाध्यक्ष शाहीको भनाई छ ।

रेडक्रसले भने विभिन्न सामाग्री आउँछ भनेर आश्वासन मात्रै दियो तर हालसम्म राहत नदिएको पीडितहरूले गुनासो गरेका छन् ।

मैकला शाहीका तीन छोरा रोजगारीका लागि भारत गएका छन । उनको घरको तल्लो तला यो वर्ष पनि डुबानमा परेको छ । वैकल्पिक व्यवस्था नभएपछि उनको घरपरिवार जोखिम मोलेर क्षतिग्रस्त घरमा बस्दै आएका छन् । अर्का बाढी पीडित कालिबहादुरको परिवार छिमेकीको घरमा बस्दै आएका छन् ।

नन्द सिंह