समाचारहरू

त्रिपुरासुन्दरी नगरपालिकामा कार्यरत १ सय ४ जना करार कर्मचारीले एक वर्षको पारिश्रमिक नपाएको गुनासो गरेका छन ।

त्रिपुरासुन्दरी नगरपालिका–४ नम्बर वडा कार्यालयमा कार्यरत सव ओभरसियर होमबहादुर कठायतले आफुले ०७८ असोजदेखिको तलबभत्ता नपाएको आरोप लगाउनु भएको छ ।

नगरपालिकामा आर्थिक अनियमितता भएको भन्दै अख्तियार दुरुप्रयोग अनुसन्धान आयोगमा उजुरी परेपछि आन्तरिक हिसाव मिलाएपछि पारिश्रमिक उपलब्ध गराउछौँ काम गर्दै जानुहोस भनि नगर प्रशासनले भनेपछि काम गर्दै गयौ तर अहिलेसम्म पारिश्रमिक पाएका छैनौ अब आन्दोलन गर्नुको विकल्प नरहेको त्रिपुराकोट स्वास्थ्य चौकीमा कार्यरत अहेव हिमेश देवकोटाले बताउनु भयो ।

त्रिपुरासुन्दरी नगरपालिकामा आन्तरिक स्रोतबाट खर्च हुने गरि नियुक्ति गरिएका अहेव, सव ओभरसियर र कार्यालय सहयोगी गरी १ सय ४ जनाले एक वर्षदेखिको तलबभत्ता पाएका छैनन् ।

नगरले आज भोली भित्रमा तलबभत्ता सबैको खातामा जान्छ ढुक्क भएर काम गर्दै जानुहोस भन्ने तर खातामा तलबभत्ता जम्मा नगर्ने गरेको कर्मचारीहरूले बताएका छन ।

सवओभरसियर कठायतले नगरपालिकाले एक वर्षसम्मको तलबभत्ता उपलब्ध गराउनुको सट्टा तलब नै नदिएर करार सेवा नवीकरण नगरेकाले सङ्घर्ष समिति गठन गरेर आन्दोलनको तयारीमा आफुहरू लागेको बताउनु भयो । तत्कालीन नगरप्रमुख ओमबहादुर बुढाले नगरको आन्तरिक स्रोतवाट उपलब्ध गराउने गरी १ सय ४ जना करार कर्मचारी नियुक्ति गर्नु भयो, तलबभत्ता पनि समयमा उपलब्ध गराउनु भएको थियो तर नयाँ प्रमुख आएपछि तलव भत्तामा राजनीति गर्न थालिएको कठायतको आरोप छ । नगरप्रमुख जनचन्द्र रोकाया नगरको आन्तरिक स्रोतले नभ्याउने भएकाले एक वर्षको तलवभत्ता केही समयभित्र उपलब्ध गराउने गरी करार सेवा नवीकरण नगरिएको बताउनु हुन्छ ।

त्रिपुरासुन्दरी नगरकार्यपालिकाको ०७९ असार ६ गते बसेको बैठकले ०७९ साउन १ गतेदेखि करारसेवाका कुनैपनि कर्मचारीको म्याद नथप्ने निर्णय गरेको छ ।

विष्णु प्रसाद देवकोटा