एक वर्षमा बालिका बलात्कार तथा दुर्व्यवहारका ५० ओटा घटना

 

सप्तरीमा जनवरीदेखि डिसेम्बरसम्मको एक वर्षको अवधिमा ३६ जना बालिका बलात्कार तथा १४ जना बालिका यौन दुर्व्यवहारका घटनाबाट पीडित भएका छन् ।

एक वर्षको अवधिमा सप्तरीमा ३५ ओटा घटनामा ३६ जना बालिका र १४ ओटा यौन दुर्व्यवहारका घटनामा १४ जना बालिका पीडित भएको भन्दै उजुरी दर्ता भएको जिल्ला प्रहरी कार्यालयले जनाएको छ ।

तथ्याङ्कअनुसार बलात्कार घटनामा ११ वर्ष मुनिका १२ जना बालिका र यौन दुर्व्यवहारबाट १२ वर्ष मुनिका सात जना बालिका पीडित भएका देखिएको छ ।

बलात्कारका आरोपित ४५ जना र यौन दुर्व्यवहारका आरोपित १७ जना रहेका छन् । बलात्कारका आरोपित सात जना १६ वर्ष मुनिका छन् भने २४ जना १८ देखि २२ वर्षका रहेका छन् । यौन दुर्व्यवहारका घटनामा १० जना आरोपित पनि १८ वर्ष मुनिका रहेको प्रहरीको तथ्याङ्कले देखाएको छ ।

बालिका बलात्कारका आरोपितमध्ये १७ जना पुर्पक्षका लागि कारागारमा थुनामा र दुई जना हालै गिरफ्तारीमा परेका छन् ।

तीन जना आरोपित जिल्ला अदालतको आदेशमा र एक जना आरोपित उच्च अदालत राजविराज इजलाशको आदेशमा रिहा भएका छन् ।

एक जना आरोपित धरौटी राखी तारेखमा रिहा भएका छन् । गिरफ्तार हुन नसकेका सात जनाविरूद्धको मुद्दा जिल्ला अदालतमा दर्ता गर्न बाँकी छ भने गिरफ्तार हुन नसकेका अन्य ११ जनाविरूद्ध जिल्ला अदालतले वारेण्टसहितको म्यादी पुर्जी जारी गरेको स्रेस्तेदार दिलकुमार वर्देवाले बताए ।

बलात्कारको घटनामा आरोपित १२ वर्षीय एक बालक संरक्षकको जिम्मामा तथा १२ र १३ वर्षीय दुई बालकलाई कैदसजाय गरी कैद स्थगनको फैसला गरिएको जिल्ला न्यायाधीश हरिश्चन्द्र ढुङ्गानाले जानकारी दिए ।

यसैगरी यौन दुर्व्यवहार घटनाका १७ जना आरोपितमध्ये एक जनालाई कैदसजायको फैसला भएको छ भने पाँच जना पुर्पक्षका लागि थुनामा र तीन जना बाल सुधार गृहमा छन् ।

तीन जना धरौटीमा रिहा भएका छन् भने दुई जना फेला नपरेको प्रहरीले जनाएको छ । एक जनाविरूद्ध वारेण्ट जारी भएको छ । १३ वर्षीय एक बालकलाई संरक्षकको जिम्मा लगाइएको छ भने एक जना हालै गिरफ्तार भएका छन् ।

घरपरिवारकै सदस्य वा छिमेकीहरूबाट सुस्त मनस्थितीकी र स–साना बालिकालाई बलात्ककार गरेका घटनामा यो वर्ष निकै बृद्धि भएको छ ।

प्रतिवाद र प्रतिरक्षा गर्न नसक्ने भएकाले अपराधिहरूले अबोध बालिकाहरूलाई प्रलोभन, डर, त्रासमा पारेर यौन दुर्व्यवहार तथा बलात्कार गर्ने गरेको पाइएको जिल्ला प्रहरी कार्यालयका एसपी राजेन्द्र विष्टको भनाई छ ।


मनोहरकुमार पोखरेल