समाचारहरू

जिल्ला सदरमुकाम खलंगा बजार भित्रका टोलहरूमा एक महिनादेखि खानेपानीको समस्या हुँदा स्थानीय मर्कामा परेका छन् । गर्मीयाम बढेसंगै पानीका मुहान सुक्दै गएपछि खानेपानीको टंकीमा पानी कम आउन थालेपछि खलंगा बजार भित्रका गैरीखाली, ठाँटी बजार, बाउनबाडा, पिपलडाँडा थाप्ले टोलहरुमा खानेपानी आपूर्तिमा समस्या भएको हो ।

भेरी नगरपालिका–४ गैरीखालीका राम प्रसाद शर्माले खानेपानी उपभोक्ता समितिले खानेपानी आपूर्तिमा वेवास्ता गरेको बताउनु भयो । खानेपानी नहुँदा होटल व्यवसाय बन्द गर्न पर्ने अवस्था भए संगै  विद्यार्थी, कर्मचारी र व्यापारीहरु समेतलाई साउनेपानी, कोटखोला र भेलालेका मुहानसम्म पानी लिन पुग्नुपर्ने बाध्यता भएको उहाँको भनाइ छ ।

खानेपानीकै अभावले जिल्ला कारागारका कैदीबन्दीहरु पनि मर्कामा परेका छन् । उनीहरुलाई पिउने पानी, शौचालय प्रयोग र सरसफाईका लागि समस्या भएपछि छिमेकीका घरबाट सहयोग मागेर समस्या टार्ने गरिएको जाजरकोट कारागारका जेलर चन्द्र बहादुर गिरीले जानकारी दिनुभयो ।

कागागारमा खानेपानी उपभोक्ता समितिको पानीमा समस्या आउने भएपछि सिधै पानीको टंकीमै मुहानबाट आउने पानीको पाईपलाईनमा जोडेर पानी ल्याउने गरेको भएपनि पानीको मुहान सुक्न थालेपछि थप समस्या भएको उहाँले बताउनु भयो ।

त्यस्तैगरी जिल्ला अस्पताल जाजरकोटमा पनि खानेपानी समस्याले अस्पताल व्यवस्थापनमा समस्या भएको अस्पतालका डाक्टर दयाराम यादवले जानकारी दिनुभयो । दैनिक अस्पताल आउने बिरामीका साथै कर्मचारीहरुलाई समेत शौचालय प्रयोग र पिउने पानीमा समस्या भएको उहाँले जानकारी दिनु भयो ।

गर्मीयाम बढेसंगै मुहान पनि सुक्ने र जिल्ला सदरमुकाम भित्र विभिन्न स्थानमा खानेपानीको पाइपलाई जडानको पनि काम भैरहेको हुँदा खानेपानी आपूर्तिमा समस्या भएको जाजरकोट खलंगा खानेपानी सहलगानी उपभोक्ता समितिका अध्यक्ष बसन्त प्रसाद शर्माले जानकारी दिनुभयो ।

करिब ३४ हजार जनसंख्या रहेको सदरमुकाम खलंगा भित्र दैनिक १९ लाख लिटर पानीको आवश्यक रहेपनि अहिले दैनिक तीन लाख लिटर मात्र पानी आपुर्ति भैरहेकोहुँदा खानेपानीको समस्या रहेको समेत उहाँले बताउनु भयो ।

दिनेश कुमार श्रेष्ठ