एक महिनादेखि वडा कार्यालयमा तालाबन्दी, सेवाग्राही प्रभावित

 

हिमा गाउँपालिकास्थित ३ नम्बर वडा कार्यालयमा चार हप्तादेखि तालाबन्दी हुँदा सेवाग्राही प्रभावित भएका छन् । वडाको केन्द्र विवादको विषयमा साउन २५ गते स्थानीयबासीले तालाबन्दी गरेका थिए ।

वडा कार्यालयमा तालाबन्दी भएपछि नागरिकता, जन्म र मृत्यु दर्ताको सिफारिस, जग्गा नामसारीको सिफारिस, पेन्सन पट्टा सिफारिस र विकास निर्माणका कामकाज ठप्प भएको जोगीवाडाका लालुनाथ योगीले गुनासो गरे ।

वडा कार्यालयमा लामो समयसम्म तालाबन्दी हुँदा पनि गाउँपालिका प्रमुख तथा उपप्रमुखको ध्यानाकर्षण समेत नभएको उनले गुनासो गरे । सेवाग्राही सेवाबाट वञ्चित हुँदा पनि गाउँपालिकाले विवाद सुल्झाउनेतर्फ कुनै चासो नदेखाएको नेपाली कङ्ग्रेसका युवा नेता लक्ष्मण शाहीले आरोप लगाए ।

हिमा गाउँपालिका–३ अन्तर्गतका जोगीवाडा र च्यामा गाउँका नागरिकलाई बेवास्ता गरी मनोमानी ढङ्गले मोफ्ला गाउँबासीलाई मात्र सेवा सुविधामा पहुँच हुने गरी वडाकार्यालय सारिएको भन्दै स्थानीयबासीले तालाबन्दी गरेका हुन् ।

तीन गाउँको केन्द्र विन्दु पर्ने च्यामा गाउँमा रहेको कार्यालय बहुमतको बलमा मोफ्ला सारिएको र सेवा सुविधामा पक्षपात गरिएको च्यामा र जोगीवाडाका स्थानीयबासीको आरोप छ ।

वडा कार्यालयको भवन निर्माणका लागि च्यामा गाउँमा जग्गा वडा कार्यालयको नाममा रजिष्ट्रेशन गरी नागरिकहरूकै पहलमा शिलान्यास गरिने सङ्घर्ष समितिका सचिव राजेन्द्रनाथ योगीले बताए । पक्षपातपूर्ण व्यवहार त्यागी न्यायोचित व्यवहार गर्न र पारदर्शी र दिगो विकास गर्न वडा तथा गाउँपालिकाका पदाधिकारीलाई उनले आग्रह समेत गरेका छन् ।

गाउँपालिकाका अध्यक्ष रजबहादुर शाहीले वडा कार्यालयमा तालाबन्दी गर्नुपर्ने समस्या नरहेको बताए । ‘यस विषयमा समस्या समाधानका लागि छलफल भइरहेको छ ।’–उनले भने ।


मानदत्त रावल