एक महिनादेखि औषधि नभएपछि बिरामी उपचारबाट वञ्चित

  ०७३ फागुन १९ गते

स्याँडा गाविसको स्वास्थ्य चौकीमा माघको १५ गतेबाट औषधि नभएपछि औषधि उपचारमा पुगेकाहरू रित्तो हात घर फर्कन बाध्य भएको स्याँडा गाविस-६ की प्रेमकला बुढाले गुनासो गरिन् ।

सो स्वास्थ्य चौकीमा सिटामोल बाहेक अन्य कुनै पनि औषधि नहुँदा यतिखेर स्याँडा गाविसका कम्तीमा पनि दिनको ३० देखि ४० जना बिरामी औषधि उपचारबाट वञ्चित भएको अर्का स्थानीयवासी भक्त परियारले बताए ।

दमको रोगबाट पीडित ६२ वर्षीया धानचाउँली वुढा भन्छिन-'आफू आएको तीन दिन भैसक्दा पनि स्वास्थ्य चौकीका इन्चार्ज खडानन्द न्यौपानेले भोलिभोलि भन्दै झारा टार्ने काम गरेको आरोप लगाइन् ।

सामान्य टाउको दुख्ने र झाडापखला समेतको औषधि नहुँदा सदरमुकाम धाउनु परेको सुरेश शाहीको भनाइ छ । उक्त स्वास्थ्य चौकीमा एक जना इन्चार्ज दुई जना अनमी र एक जना कार्यालय सहयोगी गरी जम्मा चार जनाको दरबन्दी रहेको स्वास्थ्य चौकीमा अहिले दुई जनामात्र कार्यरत रहेको इन्चार्ज न्यौपानेले बताए ।

जिल्ला जनस्वास्थ्य कार्यलय हुम्लाका निमित्त कार्यलय प्रमुख ध्रुव सिंहका अनुसार स्याँडा स्वास्थ्य चौकीका लागि औषधि तयारी भएको एक महिना भइसक्दा पनि कार्यलय सहयोगी आएर नलगेकाले समस्या भएको बताए ।


नन्द सिंह