एक दशक पुग्न लाग्दा पनि भुकम्प पीडितले अझै राहत पाएनन्

  ०८० कात्तिक ३ गते

नेपालमा गएको महाभुकम्पको झण्डै एक दशक पुग्न लाग्दा पनि स्याङ्जा गल्याङ नगरपालिका–१० पकवादीका १३ घरपरिवारले रातो कार्ड पाएपनि अझै राहत नपाएको गुनासो गरेका छन् ।

२०७२ साल वैशाख १२ गते गएको भुकम्पबाट क्षति भएका पकवादीका अझै १३ घर परिवारले रातो कार्ड पाएपनि उनीहरुले अहिलेसम्म राहत नपाएको गुनासो गरका हुन् । महाभुकम्पले स्याङ्जाका अधिकांश ठाउँमा क्षति पुर्‍याएको थियो । तेस्तै गल्याङको पकवादी गाउँमा पनि भुकम्पले ठूलो क्षति पुर्‍याएको थियो । पकवादी गाउँ सिद्धार्थ राजमार्गको करादीदेखि सात किलोमिटरको दुरीमा पर्छ । सरकारले भुकम्पबाट क्षति भएका घरको वर्गीकरण समेत गरेको थियो । भुकम्प पश्चात् जिल्लामा धेरै घर पुनर्निर्माण भए ।

पीडितले संरचना निर्माणको अवस्था अनुसार पाउनुपर्ने सबै किस्ता पाइसकेको तथ्याङ्कमा देखिएपनि पकवादीका १३ घर परिवारले भने अझै राहत नपाएको भुकम्प पीडित उदय सार्कीले बताउनुभयो । उहाँहरुले भुकम्प प्रभावितहरुले पाउनुपर्ने रातो कार्ड प्राप्त गरेतापनि घर निर्माणको लागि पाउनुपर्ने रकम नपाउँदा अहिलेसम्म आवास निर्माण गर्न नसकेकाले बस्ने स्थायी घर समेत नभएको उहाँले बताउनुभयो ।

स्थानीय तुलसीराम खनाल र सेरु खनालको पनि दुखेसो उस्तै छ । भुकम्पका नाममा आएको अनुदान सहयोग प्रभावकारी ढंगबाट वितरण गर्न नसक्दा वास्तविक पीडितले राहत पाउनबाट वञ्चित भएको उहाँहरुको गुनासो छ ।

गल्याङ–१० का वडाध्यक्ष मुक्तिराम खनालले स्थानीय स्तरबाट रातो कार्ड पाएकाहरुले राहत नपाएको कुरा स्वाीकार गर्नुभयो । उहाँले समस्या पहिचान गरेर समाधानका लागि वडा कार्यालयले पहल गर्ने बताउनुभयो ।


समिक्षा ढकाल