समाचारहरू

पञ्चेश्वर गाउँपालिका–४ की २१ वर्षीया माया लुहारको घाँटी रेटेर हत्या गरिएको अवस्थामा मङ्सिर १४ गते शव फेला परेको छ ।

माया लुहार र सोही ठाउँकी १५ वर्षीया नेहा लुहार मङ्सिर १३ गते कपडा सिलाउन पञ्चेश्वर गाउँपालिका–३ स्थित कुलाउँ गएको भएपनि घर नफर्केपछि खोजी कार्य गर्दै जाँदा माया लुहारको घाँटी रेटेर शिवनाथ गाउँपालिकामा पर्ने शिवनाथ मन्दिरस्थित नेपाल टेलीकम टावर नजिक शव फेला परेको र नेहा लुहारको घाँटी रेटिएको अवस्थामा घाइते फेला परेको पञ्चेश्वर गाउँपालिका– ४ का वडाध्यक्ष जनक चन्दले बताउनु भयो ।

हालै सम्पन्न भएको प्रतिनिधि र प्रदेशसभा निर्वाचनमा  माया लुहार म्यादी प्रहरी समेत रहनु भएको र घाँटी रेटेर घाइते हुनु भएकी नेहाको डडेल्धुरा अस्पतालमा उपचार भइरहेको वडाध्यक्ष चन्दले बताउनु भयो ।

घाइते अवस्थामा भेटिएकी नेहाले कागजमा लेखेर मायाको शव भएको ठाउँका बारेमा जानकारी दिएपछि स्थानीयले हत्या गरी फालिएको अवस्था मायाको शव भेटाएका थिए ।

शवको पोष्टमार्टमका लागि जिल्ला अस्पतालमा ल्याइएको र घटनाको अनुसन्धान भइरहेको जिल्ला प्रहरी कार्यालयका इन्स्पेक्टर लोकराज जोशीले बताउनु भयो ।

घाइते नेहाले जानकारी गराए अनुसार पञ्चेश्वर गाउँपालिका–१ स्थित नेपाल भारत सीमानाका रोलघाटमा ड्युटिमा रहेका सशस्त्र प्रहरीका जवानले मायाको हत्या गरेको आशंका स्थानीयको छ ।

केही दिन अगाडीदेखि सशस्त्र प्रहरीका जवान र माया बीच कुराकानी हुने गरेको घाइते नेहाले बताएको वडा अध्यक्ष  चन्दको भनाइ छ ।

घटनाको अनुसन्धान भइरहेकोले हत्या कस्ले गरेको अहिले नै एकीन हुन नसकेको जिल्ला प्रहरी कार्यालयका इन्स्पेक्टर जोशीले बताउनु भयो ।

नरी बडु