समाचारहरू

लुम्बिनी प्रादेशिक अस्पतालमा रहेको एकद्वार सङ्कट व्यवस्थापन केन्द्र ( ओसिएमसी )मा पीडितको पहुँच बढ्दै गएको छ ।

२०७४ देखि सुरूभएको अस्पतालमा आधारित एकद्वार सङ्कट व्यवस्थापन केन्द्रले पछिल्लो समयमा लैगिंक तथा यौन हिंसाका पीडितहरूलाई स्वास्थ्यमा पहुँच पुरयाउदै आएको छ ।

बुटवलको विद्यालयमा एक कक्षामा पढदै गरेकी ६ वर्षीया बालिका नातेदारबाट  ०७९ साउन २२ गते यौन हिंसामा पर्नु भयो । बालिकाका अभिभावकले न्यायका लागि इलाका प्रहरी कार्यालय बुटवलमा उजुरी दिए । पीडितको ओसिएमसी मार्फत चार दिन भर्ना गरेर उपचार भयो ।

उहाँ मात्र नभएर गैडहवा गाउँपालिकाकी १३ वर्षीया बौद्धिक अपाङ्गता भएकी बालिका पनि यौन हिंसाबाट पीडित हुनु भयो । उहाँले पनि ओसीएमसी मार्फत निशुल्क सेवा लिनु भयो ।

यी दुई घटना प्रतिनिधि मूलक घटना मात्र हुन यस्ता खालका विभिन्न घटनामा यौन हिंसा भोगेर ओसिएमसी मार्फत निशुल्क रुपमा सेवा लिएका छन् ।

बुटवल देवीनगरकी बसन्ती क्षेत्रीले  पहिला भन्दा अहिले ओसिएमसी सेवामा धेरै सुधार भएको बताउनु भयो । अझै सुधार गर्नुपर्ने धेरै कुराहरु रहेको उहाँले बताउनु भयो ।

एकद्वार सङ्कट व्यवस्थापन केन्द्र ( ओसिएमसी )ले े लैगिंक हिंसाबाट प्रभावित महिला, बालबालिका तथा पुरुषहरूलाई एकिकृत रुपमा विना भेदभाव गुणस्तरीय स्वास्थ्य सेवा, चिकित्साजन्य प्रमाण संकलन र संरक्षण, आवश्यक मनोविमर्श सेवाको साथै आवश्यक सुरक्षा व्यवस्था र परिवार वा समुदायमा पूर्नरस्थापना, जीविकोपार्जन तथा कानुनी सहयोग र सुरक्षित आवास उपलब्ध गराउने उद्देश्यले देशमा तोकिएका जिल्लाका केन्द्र, प्रदेश वा जिल्ला अस्पतालहरुमा स्थापना गरिएको छ ।

ओसिएमसी सेवाका लागि बलात्कार, यौनजन्य दुर्व्यवहार, शारिरीक दुर्व्यवहार, बालविवाह, स्रोत साधन र अधिकारबाट वञ्चित, मानसिक दुर्व्यवहार, परम्पराका आधारमा गरिने भेदभावबाट पीडित भएका व्यक्तिहरु सेवा लिन आउने गर्दछन् ।

ओसिएमसीले सेवा चौबिसै घण्टा निशुल्क स्वास्थ्य सेवा, खाना, छाना र नाना सहितको आधारभूत सेवा उपलब्ध गराउँदै आएको छ । सेवा केन्द्रमा आएका घटनाहरुको विश्लेषण गर्दा आर्थिक वर्ष ०७६÷०७७ मा जम्मा ५५ जनाले सेवा लिएको जसमध्ये १५ देखी १८ वर्ष उमेर समुहका संख्या ७ जना, १९ वर्षदेखि ४९ वर्ष उमेर समूहका ४६ जना र ६० वर्ष माथिका २ जना गरी जम्मा ५५ जनाले सेवा लिएका थिए ।

त्यस्तै आर्थिक वर्ष ०७७÷७८ मा १४ वर्ष मुनीका ३१ जना, १५ वर्षदेखि १८ वर्षसम्मका ६९ जना, १९ वर्षदेखि ४९ वर्षसम्मका १ सय ४० जना, ५० वर्षदेखि ६० वर्षसम्मका ११ जना र ६० वर्षमाथि उमेर समुहका ८ जना गरी जम्मा २ सय ५८ जना रहेका छन् ।

सेवा केन्द्रमा आर्थिक वर्ष ०७८÷०७९ मा १४ वर्ष मुनीका ७१ जना,१५ देखि १८ वर्षका ८५ जना,१९ वर्षदेखि ५९ वर्षका ३ सय २९ जना, ६० वर्षमाथिका १० जना गरी ४ सय ९५ जनाले सेवा लिएका छन् । त्यस्तै ०७९÷८० को  १४ वर्ष मुनी १८ जना, १५ देखी १८ जना ५२ जना, १९ देखि ४९ १ सय ३४ जना, ५० देखि ६० २ जना र ६० वर्ष माथिका २ जना गरी जम्मा २ सय ८ जनाले सेवा लिएको ओसिएमसी फोकल पर्सन कान्ति पाण्डेले बताउनु भयो ।

ओसिएमसीमा कार्यरत स्टाफनर्स दिप्ती थापाले ओसिएमसी सेवालाई प्रभावकारी बनाउनका लागि पीडितलाई न्यायमा पहुँच पुरयाउनका विभिन्न प्रयासहरु गरीरहेको बताउनु भयो ।

पीडितहरुको मानसिक स्वास्थ्यलाई सन्तुलन गराउने गरी काम गरेकाले विगतको वर्षको तुलनामा हिंसा पीडित सेवा लिनेको संख्या बढेको बताउनु भयो ।

रीमा बिसी