एउटै विद्यालयका ५७ जना विद्यार्थीमा देखियो ठेउला रोग

  ०७९ असार ५ गते

उत्तरी नाम्खा गाउँपालिका–४ याल्वाङ गाउँको महाबौद्ध माध्यमिक विद्यालयको छात्रवासमा बस्दै आएका विद्यार्थीलाई ठेउला रोगको लक्षणसँग मिल्ने समस्या देखिएको छ ।

स्वास्थ्य सेवा कार्यालय, हुम्लाका प्रमुख प्रेमबहादुुर सिंहका अनुुसार एक जना विद्यार्थीमा देखिएको आशंका गरिएको ठेउला रोग हाल ५७ जना विद्यार्थीमा सरेको छ । विद्यार्थीमा लागेको रोगको लक्षण पुरै ठेउलासँग मिल्दोजुल्दो रहेको र छात्रबास भरिनै विद्यार्थी विरामी भएको स्वास्थ्य सेवा प्रमुख सिंहले जानकारी दिनु भएको छ ।

ठेउला रोग सरेका विद्यार्थीमा अनुुहार, शरीर र पाखुुराभरी ठेउलाजस्तै फोका आएको छात्रबासका संचालक कुमार लामाले बताउनु भयो । उहाँले भन्नु भयो रोग पत्ता लगाउनका लागि सदरमुकाम सिमकोटको जिल्ला अस्पतालबाट डक्टरको टोली माग गरिएको छ ।

जेठ अन्तिम हप्तादेखि देखा परेको सो रोग चेकजाँचका लागि गाउँपालिका केन्द्र यालवाङमा रहेको स्वास्थ्य चौकीमा कुनै स्रोत साधन नरहेका कारण जिल्ला अस्पतालबाटै स्वास्थ्यकर्मी आउनु पर्ने गुनासो लामाले गर्नु भयो ।

बिरामी विद्यार्थीको शरीरमा देखिएको लक्षण हेर्दा ठेउला भएको हुन सक्ने भएकाले उपचार गर्न र परीक्षणका लागि नमुना सङ्कलन गर्न केही दिन भित्रै डक्टरको टोली विद्यालय जाने तयारी गरिएको स्वास्थ्य सेवा कार्यालयका प्रमुख सिंहले बताउनु भयो ।

चिकित्सकबाट परीक्षण गरेपछि त्यसको आधिकारिक पुष्टि हुने भन्दै उहाँले बिरामी विद्यार्थीलाई एकै ठाउँमा राखिएको प्रमुख सिंहले जानकारी दिनु भयो ।

यसको जानकारी विश्व स्वास्थ्य सङ्गठन र रोग नियन्त्रण महाशाखा सुर्खेतलाई गरिसकिएको प्रमुख सिंहले बताउनु भयो ।

अस्पतालकी वरिष्ठ अनमी सरिता बोहराले यो भाइरसबाट सर्ने सरुवा रोग भएका कारण अन्य मानिसमा सर्ने डर देखिएको बताउनु भयो । नाम्खा गाउँपालिकाका प्रमुख प्रशासकीय अधिकृत धर्मराज न्यौपानेले चिकित्सकबाट ठेउला रोग भन्ने पुष्टि भएपछि विद्यालय समेत बन्द गर्ने पक्षमा गाउँपालिका रहेको जनकारी दिनु भयो ।


नन्द सिंह