उम्मेदवारका छोरामाथि धारिलो हतियार प्रहार

  ०७९ वैशाख २६ गते

देवताल गाँउपालिका–२ दक्षिण झिटकैया निवासी नेपाली काँग्रेसका वडा सदस्यका उम्मेदवार रामबाबु यावदका ३५ वर्षीय छोरा अनिल यादवलाई जनता समाजवादी पार्टीबाट सोही गाँउपालिकाका अध्यक्ष पदका उम्मेदवार ३८ वर्षीय उदयप्रसाद यादव र सोही टोलका २१ वर्षीय रोशन यादवले वैशाख २४ गते धारिलो हतियार र वाँसको लाठी प्रहार गरी घाइते बनाएको पीडित पक्षको आरोप छ ।

खाना खाइरहेको अवस्थामा धारिलो हतीयार र बाँसको लाठीले प्रहार गर्दा दुई जनालाई चिनेको र अन्य ब्याक्तिहरुले आक्रमण गरेको थाहा नपाएको पीडित अनिल यादवले बताउनु भयो ।

धारिलो हतीयार प्रहार गरेपछि बेहोस भएकाले अरु ब्याक्तिहरु मध्ये क–कसले आक्रमण गरे जानकारी नभएको उहाँले बताउनु भयो ।

चुनावमा नगद लिएर आफुलाई भोट दिनका लागि गाउँपालिकाका अध्यक्षका उम्मेदवार उदयप्रसाद यादवले पटक पटक धम्की दिएकोमा आफुले रकम नलिने र भोट पनि नदिने भनेपछि वैशाख २२ गते देखि आक्रमण गर्ने प्रयास गरिरहेको पीडितको आरोप छ ।

पीडितको टाउको, बाँया आँखा र शरिरका विभिन्न स्थानमा धारिलो हतियारले काटेको र बाँसका लठीले प्रहार गर्दा डाम परेको छ ।

पीडितको वैशाख २४ गते कलैया अस्पतालमा प्राथमिक उपचार गरि थप उपचारका लागि नेशनल मेडिकल कलेज बीरगंजमा वैशाख २४ गतेदेखि उपचार भइरहेको छ ।

जिल्ला प्रहरी कार्यालय बारामा वैशाख २५ गते अङ्गभङ्ग मुद्दामा अनुसन्धान गरी कारवाहीका लागि उजुरी दिएको पीडितका बुबा र कांग्रेसका वडा सदस्यका उम्मेदवार रामबाबु यावदले बताउनु भयो । घटनाका विषयमा अनुसन्धान भइरहेको जिल्ला प्रहरी कार्यालयका डिएसपी राजेश थापाले बताउनु भयो ।


भोलानाथ पौडेल