उपभोक्ताको स्वास्थ्य माथि लापरवाही, चामलमा भेटियो युरिया मल

पर्वतको कुश्मा नपा–७ गोदाम बस्ने कृष्णप्रसाद आचार्यले बजारबाट किनेर लगेको चामलमा युरिया मल मिसाबट भएको पाइएको छ ।

सौरभ फुड प्रोडक्टस प्रालि बाराले उत्पादन गरेको सोल्टी ब्राण्डको जिरा मसिनो चामलको सिल गरिएको बोरा खोल्दा युरिया मल भेटिएको हो ।

सदरमुकाम कुश्माबजारको दुर्लुङ्गचोकमा रहेको प्रभु शरणम् किराना पसलबाट माघ २० गते बेलुकी चामल घर लगेको र माघ २१ गते बिहान भात पकाउने क्रममा चामलमा युरिया भेटिएको आचार्यले बताए ।

अघिल्लो दिन सोही बोराको चामल पकाएर खाँदा परिवारका सदस्यलाई झाडापखाला लागेपछि शङ्का लागेर चामल हेर्दा युरिया मलका सेता दाना बाक्लै भेटिएपछि जिल्ला प्रशासन कार्यालय, पर्वतमा उजुरी दिएको आचार्यले बताए ।

‘बेलुका भात पकाएर खाँदा सबैलाई पखाला लागेपछि बिहान चामल हेर्दा युरिया देखियो ।’–आचार्यले भने–‘त्यसपछि प्रशासनमा खबर गरेको हुँ । आचार्यले माघ २१ गते जिल्ला प्रशासन कार्यालय पर्वतमा उजुरी दिएका हुन् ।

सौरभ फुड प्रोडक्टले ०७५ मङ्सिर २५ गते प्याकिङ्ग गरेको ब्याच नं. २९ को सो सोल्टी जिरा मसिनो चामलको बोरा प्रशासन कार्यालयमा राखिएको छ । चामलको उपभोग्य मिति भने २४ महिना रहेको उल्लेख छ ।

उपभोक्ता आचार्यको उजुरीको आधारमा खाद्य प्रविधि तथा गुण नियन्त्रण डिभिजन कार्यालय, बागलुङका निमित्त प्रमुख केदार पौडेल सहितको टोलीले सो चामलको बोरा अध्ययन अनुसन्धानका लागि लिईएको जनाएको छ ।

पसलको गोदाममा रहेका अन्य बोराहरू हेर्दा भने यूरियाको मिसावट नभएको पाइएको निमित्त प्रमुख पौडेलले बताए ।

डिभिजन कार्यालयको प्रारम्भिक अनुसन्धानका क्रममा चामल उत्पादकले नै त्रुटि गरेको निश्कर्षमा पुगिएको र थप अनुसन्धानका लागि चामल प्रयोगशाला पठाइने पौडेलले जानकारी दिए ।

सो घटनाबारे अनुसन्धान भइरहेको र उपभोक्ताको स्वास्थ्य अधिकार हनन् भएको प्रमाणित भएमा दोषीलाई कानुन बमोजिम कारवाही गरिने पर्वतका प्रमुख जिल्ला अधिकारी गुरूदत्त ढकालले बताए ।


सन्तोष थापा