उपनिर्वाचन ०८१- इलाम २ उपनिर्वाचनका लागि तोकियो निर्वाचन अधिकृत

  ०८० चैत २१ गते

इलाम निर्वाचन क्षेत्र न.२ मा ०८१ वैशाख १५ गतेका हुने चुनावका लागि निर्वाचन आयोगले निर्वाचन अधिकृत तोकेको छ । निर्वाचन आयोगले उपनिर्वाचनका लागि ०८० चैत २० गते जिल्ला अदालतका न्यायाधीश केशवप्रसाद घिमिरेलाई मुख्य निर्वाचन अधिकृत तोकेको हो ।

इलाम सदरमुकाममा चैत २२ गते मुख्य निर्वाचन अधिकृतको कार्यालय स्थापना गरिने जिल्ला निर्वाचन कार्यालयले जनाएको छ । मुख्य निर्वाचन अधिकृतको कार्यालय स्थापनापछि मात्र मतदाता नामावली टुङ्ग्याइने छ । उपनिर्वाचन कार्यतालिका अनुसार चैत २४ मा उम्मेदवारी मनोनयन हुनेछ । उपनिर्वाचनका लागि आयोगमा लागि २० दल दर्ता भएका छन् ।

निर्वाचन नजिकिंदै गर्दा निर्वाचनका लागि आवश्यक सामग्री केन्द्रबाट चैत २३ सम्ममा आइपुग्ने जिल्लास्थित निर्वाचन कार्यालयका सूचना अधिकारी कृष्ण लिम्बूले बताउनु भयो । बाँकी सामग्री खरिदको प्रक्रिया पनि अघि बढाइएको छ । जिल्ला निर्वाचन कार्यालयले निर्वाचनका लागि खटिने कर्मचारीको नामावली सङ्कलन गरिसकेको छ ।

इलाम निर्वाचन क्षेत्र न. २ मा ७९ ओटा मतदानस्थल र १ सय ४९ ओटा मतदान केन्द्र तोकिएको छ । यी केन्द्रमा खटिने ८ सय ९४ जना कर्मचारीको विवरण सङ्कलन गरिएको जिल्ला निर्वाचन कार्यालयले जनाएको छ ।

निर्वाचन आयोगको कार्यतालिकाअनुसार चैत २७ मा उम्मेदवारको अन्तिम नामावली प्रकाशन र उम्मेदवारलाई चुनाव चिह्न वितरणको कार्यक्रम छ । चैत २२ गते मतदाताको अन्तिम नामावली प्रकाशन हुनेछ । चैत २८ देखि वैशाख १२ सम्म प्रचारको अवधि राखिएको छ । ०८१ वैशाख १५ बिहान ७ देखि साँझ ५ बजेसम्मलाई मतदानको समय तोकिएको छ ।

 


मनोज अधिकारी