उपनिर्वाचन ०८१- इलाममा मुख्य निर्वाचन अधिकृतको कार्यालय स्थापना

  ०८० चैत २३ गते

इलाम क्षेत्र न.२ मा ०८१ वैशाख १५ गते हुने प्रतिनिधिसभाको उपनिर्वाचनका लागि सदरमुकाममा चैत २२ गते मुख्य निर्वाचन अधिकृतको कार्यालय स्थापना गरिएको छ । मुख्य निर्वाचन अधिकृतको कार्यालयको उद्घाटन निर्वाचन आयुक्त जानकी तुलाधरले ०८० चैत २२ गते गर्नु भएको छ ।

नेपाल बार एसोसिएसनको भवनमा कार्यालय निर्वाचन अधिकृतको कार्यालय स्थापना गर्दै आयुक्त तुलाधरले शान्तिपूर्ण र सभ्य ढङ्गले नमुनाकै रूपमा इलाम निर्वाचन क्षेत्र न.२ मा चुनाव सम्पन्न गराउने बताउनु भयो । उहाँले उपनिर्वाचनका लागि आवश्यक सबै संयन्त्र तयारी अवस्थामा रहेको बताउनु भयो ।

मुख्य निर्वाचन अधिकृतको कार्यालय स्थापनापछि चैत २४ गते उम्मेदवारी मनोनयन दर्ता हुने मुख्य निर्वाचन अधिकृतको कार्यालयले जनाएको छ । अन्तिम नामावली प्रकाशन र उम्मेदवारलाई चुनाव चिह्न वितरणको कार्यक्रम चैत २७ लाई राखिएको छ । चैत २८ देखि वैशाख १२ सम्म प्रचारअवधि राखिएको छ । ०८१ वैशाख १५ बिहान ७ देखि साँझ ५ बजेसम्मलाई मतदानको समय तोकिएको छ ।

संविधानसभा अध्यक्ष तथा पूर्वसभामुखसमेत रहेका नेकपा (एमाले) उपाध्यक्ष सुवासचन्द्र नेम्बाङको ०८० भदौ २६ मा निधन भएपछि रिक्त क्षेत्रमा उपनिर्वाचन हुन लागेको हो । आउँदो उपनिर्वाचनका लागि २० ओटा दल दर्ता भएको जिल्ला निर्वाचन कार्यालयले जनाएको छ ।

Photo 20240405 Ilam


मनोज अधिकारी