समाचारहरू

छेडागाड नपा–१० की ३८ वर्षीया पञ्चकला नाथ योगीको उपचारका क्रममा स्वास्थ्यकर्मीको लापरवाहीबाट मृत्यु भएको भन्दै स्थानीयबासी र आफन्तले कारबाहीको माग गरेपछि घटनाका आरोपित सोही नपा–५ थलहबजारस्थित जयलक्ष्मी मेडिकल फर्मका सञ्चालक तिलकबहादुर बोहोरालाई प्रहरीले भदौ २९ गते गिरफ्तार गरेको छ ।

ज्वरो आउने गरेपछि उपचारका लागि जयलक्ष्मी मेडिकल फर्म गएकी योगीको उपचारका क्रममा भदौ २८ गते मृत्यु भएको थियो । नाथको मृत्युपछि आक्रोशित स्थानीय र आफन्तले मेडिकल सञ्चालक तिलकबहादुर बोहोरालाई कारबाही र क्षतिपूर्तिको माग गर्दे प्रदर्शन गरेका थिए । घटनापछि प्रहरीले मेडिकलका सञ्चालक बोहोरालाई गिरफ्तार गरेको हो ।

उपचारमा लापारवाही भएपछि आमाको ज्यान गएको मृतकका जेठा छोरा किशोर नाथले आरोप लगाए । ‘आमालाई ज्वरो आएको र सामान्य छाति दुख्ने समस्या भएपछि भदौ २८ गते थलहबजारमा रहेको मेडिकल लग्यौँ । मेडिकल सञ्चालक बोहोराले चेकजाँच गरेपछि तीनवटा सुई लगाइदिए ।’–उनले भने–‘औषधि खान दिए । उनले अब घरमा लैजानुहोस ठिक हुन्छ भनेपछि घर लैजाने क्रममा बाटोमा आमाको मृत्यु भयो । गलत औषधिको प्रयोगले आमाको ज्यान गयो । निको होला भनेर स्वास्थ्य संस्था लग्यौँ । तर, गलत औषधि दिएर ज्यानै लिएपछि लापरवाही नभनेर के भन्ने ?’

शव पोष्टमार्टमका लागि जाजरकोट अस्पताल ल्याइँदै गरेको जिल्ला प्रहरी कार्यालयका इन्स्पेक्टर लोकबहादुर बिष्टले बताए । घटनाका विषयमा अनुसन्धान सुरू गरिएको प्रहरीले जनाएको छ ।

सुर्खेतस्थित जयलक्ष्मी मेडिकल फर्मको नामबाट बोहोराले मेडिकल सञ्चालन गर्दै आएका थिए । मेडिकल सञ्चालनका लागि फार्मेसी पढेर मेडिकल काउन्सिलबाट प्रमाणपत्र लिनुपर्ने प्रावधान छ तर उनले अर्कोको नामबाट ०५४ सालदेखि मेडिकल सञ्चालन गर्दै आएका थिए ।

मेडिकल सञ्चालक बोहोरालाई आवश्यक अनुसन्धानका लागि गिरफ्तार गरेर जिल्ला सदरमुकाम ल्याउन निर्देशन दिइएको इन्स्पेक्टर बिष्टको भनाई छ ।

केही दिनअघि मात्र स्थानीय प्रशासनले अनुगमन गर्दा बोहोराले अवैध रूपमा मेडिकल सञ्चालन गरेको पाइएको थियो । बोहोराले प्रशासनसँग मेडिकल नचलाई बन्द गर्ने सहमति गरेका थिए ।

दिनेशकुमार श्रेष्ठ