समाचारहरू

सोलुदूधकुण्ड नगरपालिका–४ सुर्केका तीन वर्षीय ङिमानुरू शेर्पाको उपचारका क्रममा जिल्ला अस्पतालमा फाप्लुमा वैशाख ३० गते मृत्यु भएपछि पीडित पक्षले अस्पताल तोडफोड गरेको छ ।

झाडावान्ताका बिरामी बालकलाई वैशाख ३० गते बिहान ७ बजे अस्पताल ल्याए पनि चिकित्सकले बिहान ११ बजेपछि मात्र उपचार गर्दा बालकको मृत्यु भएको पीडित पक्षको आरोप छ ।

समयमा बालकले उपचार नपाएका कारण मृत्यु भएको भन्दै अस्पतालको आकस्मिक कक्ष तोडफोग गर्ने पीडित बालकका काकालाई गिरफ्तार गरेको जिल्ला प्रहरी कार्यालयका इन्स्पेक्टर ऋषिराज ढकालले इन्सेक प्रतिनिधिसँगको भेटमा बताउनु भयो ।

झाडावान्ताका बिरामी बालकलाई वैशाख २८ गते अस्पताल ल्याएको तर चिकित्सकले सामान्य उपचार गरी घर पठाएको पीडित बालकका बाबु दावा गेलु शेर्पाले बताउनु भयो ।

उपचारपछि बालकको अवस्था बिग्रिदै गएपछि पुन वैशाख ३० गते अस्पताल ल्याएको बाबु दावा गेलु शेर्पाले बताउनु भयो ।

बालकलाई प्रशस्त पानी पिलाउँनुको सट्टा फलफूल र फ्रुटी खान दिएर अवस्था जटिल भएपछि अस्पताल ल्याउँदा उपचार प्रभावकारी नभएको जिल्ला अस्पताल फाप्लुकी निमित्त प्रमुख सानी शेर्पाले बताउनु भयो ।

तोडफोडबाट आकस्मिक कक्षसहित अन्य उपचार सामाग्रीमा क्षति पुगेपनि यकिन  विवरण प्राप्त नभएको अस्पताल प्रशासनले जनाएको छ ।

पीडित पक्षले बालकको शव नबुझेपछि अस्पतालमै राखिएको छ ।

भोजराज कार्की