उपकरणको अभावमा जिल्ला अस्पतालबाट डायलसिस सेवा पाउनबाट वञ्चीत

उपकरणको अभावमा मध्यविन्दु जिल्ला अस्पतालमा सुरूवात भएको डायलसिस सेवा बिस्तारमा कठिनाई भएको छ । मिर्गौला रोगीका लागि अस्पतालले ०७९ मङ्सिर  १३ गतेबाट निःशुल्क डायलसिस सेवा सुरू गरेको थियो ।

अस्पतालमा हाल चार वटा डायलसिस गर्ने उपकरण रहेको छ । जस मध्ये एक वटा उपकरण रिजर्भमा राखेर तिन वटा मात्रै उपकरण सञ्चालनमा रहेर हाल नौ जनाले नियमित डायलसिस सेवा प्राप्त गर्नुं भएको  अस्पतालका मेडिकल सुपरिटेन्डेन्ट डा. जितेन्द्र कण्डेलले बताउनु भयो ।

मिर्गौला रोगीले हप्तामा कम्तीमा दुई पटक डायलसिस गर्नुपर्ने हुन्छ । हाल अस्पतालले नौँ  जनालाई प्रदान गरेको सेवा आन्तरिक श्रोतबाट भरपाई भइरहेको र डायलसिस सेवा सुचिकरण नहुदाँ उक्त खर्चको सरकारबाट भरपाई हुन नसकेको उहाँले बताउनुभयो ।

डायलसिस सेवा सुचिकरणको लागि पनि पाँच वटा डायलसिस उपकरण आवश्यक पर्छ । तर, थप एक वटा उपकरण खरिदको लागि स्रोत सुनिश्चितता नहुदाँ अस्पताल सुचिकरण समेत हुन नसक्ने अवस्थामा रहेको कण्डेलले बताउनुभयो । हालको अवस्थामा सेवालाई दुई सिफ्टमा सञ्चालन गरेर १८ जना सम्मको डायलसिस गर्न सकिने भएपनि जनशक्ति र खर्चको व्यवस्थापन नहुदाँ हाल कै अवस्थामा त्यो समेत सम्भव नभएको उहाँले बताउनुभयो ।

अस्पतालमा डायलसिस सेवाका लागि हाल सम्म थप ८० जना मिर्गौला रोगीले नाम लेखाएको कण्डेलले बताउनुभयो । तर, उपकरण र जनशक्तिको अभावमा थप बिरामीहरूलाई सेवा प्रदान गर्न अस्पताल असमर्थ रहेको छ । जसको कारण सेवा लिन चितवन, काठमाण्डौं पुग्नुपर्ने बाध्यता मिर्गौला रोगीहरूको छ ।

अस्पतालमा पूर्वाधार र जनशक्ति व्यवस्थापनको लागि जिल्लाका स्थानीय तहहरू संग सहयोग मागिएको उहाँले बताउनुभयो । उहाँले भन्नुभयो –पूर्वाधार र जनशक्ति व्यवस्थापनको लागि स्थानीय तहसंग सहयोग मागेको र कावासोती नगरपालिकाले १५ लाख रुपैया बिनियोजन गरेको छ भने  मध्यविन्दुमा पनि केही रकम छुट्टिएको जानकारी आएको उहाँले बताउनुभयो ।

जिल्लामा एक सय जनाको आसपास डायलसिस गर्नुपर्ने मिर्गौला रोगीहरू रहेको डा. जितेन्द्र कण्डेल बताउनुहुन्छ । अस्पतालमा कम्तीमा १० वटा उपकरण मार्फत दुई सिफ्टमा सेवा प्रदान गर्न सके सेवा प्रवाह प्रभावकारी र सेवाग्राहीको लागि समेत सहज हुने उहाँले बताउनुभयो । यसको लागि केन्द्र, प्रदेश र स्थानीय सरकारबाट आवश्यक स्रोतको सुनिश्चितता हुनुपर्ने उहाँले बताउनुभयो ।


तिर्थराज डुम्रे