समाचारहरू

सिर्द्धार्थनगर उद्योग वाणिज्य सङ्घ कार्यसमिति सदस्य तथा रवि सपिङ्ग सेण्टर र करण इन्टरपराइजेजका प्रोप्राइटर ३८ वर्षीय हरिश सेठियामाथि भारतीय नम्बर प्लेट भएको मोटर साइकलमा आएका अपरिचित व्यक्तिले गोली प्रहार गरेका छन् ।

इन्सेक रुपन्देही जिल्ला प्रतिनिधि रिमा बिसीका अनुसार युपी ५६ ई ४१४९ नं.को मोटरसाइकलमा आएका अपरिचित दुईजनाले फागुन २८ गते राति पौने ९ बजे सिर्द्धार्थनगर नपा-५ सेवापथमा रहेको सेठियाको घर नजिकै गोली प्रहार गरेका थिए ।

घटना स्थलबाट प्रहरीले कटुवा फेस्तोल त्यसमा लाग्ने ४ गोली र आरोपितले प्रयोग गरेको मोटरसाईकल बरामद गरेको छ ।

घटनापछि प्रहरीले चारैतिर सुरक्षा घेरा हालेको थियो । घटनापछि गोली हानेर भाग्दै गरेको आरोपमा भारतको नौतनहवा घर बताउने ४६ वर्षीय भारतीय नागरिक रामदान मुसलमानलाई स्थानीयको सहयोगमा सिर्द्धार्थनगर नपा-३ बाट मोटरसाइकल सहित गिरफ्तार गरिएको जिल्ला प्रहरी कार्यालयका डिएसपी डिल्लीनारायण पाण्डेले बताए । घटनाका आरोपित एक जना फरार रहेका छन् ।

इन्सेक विराटनगर कार्यालयका अनुसार आठ दिनदेखि बेपत्ता सुनचाँदी ब्यवसायी सङ्घ झापाका सदस्य साजन मुखियाको शव फागुन २८ गते बोराभित्र सड्न लागेको अवस्थामा फेला परेको छ ।

इलामको रोङ गाँउपालिका-३ कोल्बुङ (लसुने डाँडा)स्थित सडकबाट २० फिट तल जुटको बोरामा राखेर फालिएको अवस्थामा शव फेला परेको झापा प्रहरीले जनाएको छ ।

विर्तामोडस्थित दावा ज्वेलर्स सुनचाँदी पसलका सञ्चालक मुखिया फागुन २० गते पत्नी रवीनालाई बजार जाने भन्दै बाहिरिएका थिए ।

घरबाट हिडेको आठ दिनपछि पछाडि हात बाँधिएको र अनुहार काटिएको अवस्थामा शव फेला परेको जिल्ला प्रहरी कार्यालय झापाका एसपी विष्णुबहादुर केसीले बताए ।

अनलाइन डेस्क