उदयपुरका बाढी प्रभावितलाई प्रदेश सरकारद्वारा राहत उपलब्ध गराउन सुरु

  ०७९ साउन १९ गते

सप्तकोशी नदीको भङ्गालो बेलका नगरपालिका–८ डुम्रीबोट पश्चिमबाट गाउँतर्फ पसेपछि प्रभावित भएकाहरूलाई प्रदेश सरकार १, सरकारको आन्तरिक मामिला तथा कानुन मन्त्रालयले राहत उपलब्ध गराउन थालेको छ ।

साउन १६ गतेको वर्षापछि कोशी नदीको भङ्गालो बेलका नगरपालिका–८ बाट वस्तीमा परेपछि सो क्षेत्रका १ हजार ५ सय परिवारका नौ हजार भन्दा बढी प्रभावित भएका छन् ।

कोशी नदी पश्चिमतर्फको डिल कटान गर्दै भङ्गालो गाउँपसेपछि बेलका नगरपालिकाका पाँच ओटा वडाहरू डुवान समस्या रहेको बेलका नगरपालिकाकी उपप्रमुख जीरा राईले बताउनु भयो ।

राष्ट्रिय विपद् जोखिम न्यूनीकरण तथा व्यवस्थापन प्राधिकरण,सिंहदरबारले प्रेस नोट जारी गरी बाढी प्रभावितहरूलाई प्रदेश सरकारमार्फत राहत उपलब्ध गराउन थालेको जानकारी गराएको छ ।

प्राधिकरणले प्रदेश सरकारले साउन १८ गते बाढी प्रभावित क्षेत्रबाट १ हजार घरपरिवारलाई सुरक्षित स्थानमा सारेको प्रेस नोटमा उल्लेख गरेको छ ।

मन्त्रालयले पीडितका लागि खाद्यान्न लगायत राहतका सामग्री साउन १९ गते पठाएको आन्तरिक मामिला तथा कानुन मन्त्री केदार कार्कीले बताउनु भएको छ । । मन्त्री कार्कीले भन्नुभयो– बाढी प्रभावितहरूलाई खानले मर्न दिन्नौँ, सरकार उद्दार र राहतको काममा जुटिरहेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको समन्वयमा बेलायत सरकारको रकेएर नेपालले प्रदेश सरकारमार्फत बाढीबाट विस्थापित भएकाहरूलाई खाद्यान्न खरिदका लागि ६ लाख रुपियाँ उपलब्ध गराएको कानुनी मन्त्री केदार कार्कीले बताउनु भएको छ ।

रेडक्रस सोसाइटीले १ सय थान त्रिपाल, ६ थान हेल्मेट र खाद्यान्न खरिदका लागि ५० हजार रुपियाँ उपलब्ध गराएको छ ।

आन्तरिक मामिला तथा कानुन मन्त्रालयका सचिव कालीप्रसाद पराजुलीले ९ हजार किलो चामल, ३५ किलो दाल, ३५ लिटर तेल र बिस्कुट,चाऊचाऊ आदि साउन १९ गते बाढी प्रभावितहरूलाई वितरणका लागि पठाएको बताउनु भएको छ ।

सप्तकोशी मुल प्रवाह नै बाँधमा ठोक्किएर साउन १७ गते दिनभर बाँध कटान गरेपछि साउन १८ गते ४ बजेबाट नदी बाढी गाउँमा पसेको बेलका नगरपालिकाकी उपप्रमुख जीरा राईले बताउनु भयो । कोशीको भङ्गालो गाउँपसेपछि गाउँ जलमग्न भएको छ ।

जसका कारण बेलका नगरपालिका–८ को सिसौली, वडा–९ को धौरी, वडा–३ को भोटेपुल, दुर्गा मन्दिर, एवीसी टप्पु, जगना, गुणीटोल र वडा–२ को लालभित्ती, बानडाँडा, चन्द्रपुर र वडा–१ को पुरन्दह, करैया, बेलहा डुबानमा परेको छ ।

वि.स.२०४५ सालमा अहिले कोशी फुटेकै ठाउँबाट नदी बग्ने गरेको थियो । पछि कोशी नदी पूर्वतर्फ धकेलिएका कारण पश्चिमी क्षेत्रमा बालुवा गिटी थुप्रिएर केही अग्लो डिल बनेको थियो ।

बाढी प्रभावितहरूको उद्दार गरी सुरक्षित राख्नका लागि बेलका नगरपालिका–९ धौरीमा ५ सय घरपरिवार, वडा–८ को एकता, चिलिया,दुर्गा मन्दिर टोलमा ५ सय घरपरिवार, वडा–३ को वुधवारे, जणना, नारायणपुर, शिवालय मन्दिर, लालभित्त, भागलपुरमा ८ सय घरपरिवारका लागि आश्रयस्थल बनाउने निर्णय गरिएको आन्तरिक मामिला तथा कानुन मन्त्रालयको सञ्चार शाखाले जनाएको छ ।

phpto 20220804 Udayapur (1)

phpto 20220804 Udayapur (3)phpto 20220804 Udayapur (2)


इन्सेक प्रदेश १, कार्यालय विराटनगर